ފިއްލަދޫ އޮފީސް ހިސޯރުކުރުން : ރައްޔިތުން ބޭނުންވާގޮތަށް ފައިސާ ނުބަހައިފިނަމަ ރަށު އޮފީސް އަންދާލާނެކަމުގެ އިންޒާރު ބައެއް ރައްޔިތުން ދީފި
ސުނާމީ ކާރިސާގައި ހއ. ފިއްލަދޫން ގެއްލުން ލިބުނު ފަރާތްތަކަށް ސަރުކާރުން ދެމުންދާ ފައިސާ ރައްޔިތުން ބޭނުންވާ ގޮތަށް ނުބަހައިފިނަމަ އޮފީސް އަންދާލާނެކަމުގެ އިންޒާރު ބައެއް ރައްޔިތުން ދޭންފަށައިފި ކަމަށް ކަތީބު ވިދާޅުވެއްޖެ އެވެ
ފިއްލަދޫ ކަތީބު އަހުމަދު ފުއާދު ވިދާޅުވީ ރައްޔިތުންގެ ތެރެއިން ބަޔަކުނުކުމެ ރަށު އޮފީސް ހުޅުވިޔަނުދީ ހިސޯރުކޮށްގެން ތިބޭތާ 2 ދުވަސް ވެއްޖެކަމަށާއި މިކަން އަތޮޅު އޮފީހަށް އެންގުމުން އެފަރާތުން އަދި ވަކިއެއްޗެއް އަންގާފައި ނުވާ ކަމަށެވެ
” އަޅުގަނޑު ގުޅާއިފިން ޑިޒާސްޓަރ މެނޭޖުންމަންޓް ސެންޓަރާވެސް. އެފަރާތުން ވިދާޅުވީ އަތޮޅު އޮފީހުން ވިދާޅުވީއޭ ސުލްހަވެރިކަމާ އެކު އެފައިސާ ބަހަލާނަމޭ. ނަމަވެސް ރައްޔިތުންގެ ތެރޭއިން ބައެއް މީހުން ބުނަމުން އެގެންދަނީ ރައްޔިތުން ބޭނުންވާގޮތަށް އަންގާފައިވާނޭކަމަށާއި އެނޫން ގޮތަކަށް ފައިސާ ބަހައިފިނަމަ ރަށު އޮފީސް އަންދާލާނެކަމަށް“ ފުއާދު ވިދާޅުވި އެވެ
މީގެ އިތުރުން އޮފީސް ހިސޯރުކޮށްގެން ތިބި ރައްޔިތުންގެ ތެރޭން މީހަކު ބުނީ ރައްޔިތުން ބޭނުންވާ ގޮތަށް ފައިސާ ބެހުމަށް އެއްބަސް ނުވެ ނުވަތަ ރައްޔިތުންނަށް ގަބޫލުކުރާ ފަދަ ހުށަހެޅުމެއް ސަރުކާރުން ހުށަނާޅާހާ ހިނދަކު އޮފީސް ހުޅުވިޔަ ނުދޭނެކަމަށެވެ
” ރައްޔިތުން ބޭނުންވާ ގޮތް އެގުމުންވެސް ސަރުކާރުން މިބުނަނީ ކުރިންވެސް ފައިސާ ބެހުމަށް ހަމަޖެހިފައިވާ ގޮތަށޭ ފައިސާ ބަހާނީ, އެހެންވެ ރައްޔިތުން ބޭނުމެއް ނުވޭ ރަށުއޮފީހެއްވެސް, ސަރުކާރެއްވެސް, ރައްޔިތުން ބޭނުންނުވާ ގޮތަށް ފައިސާ ނުބަހައިފިނަމަ އޮފީސް އަންދާލާނެކަމަށް ނުވަތަ ތަޅާލާނެކަމަށް ބައެއް މީހުން އެދަނީ ބުނަމުން.“ އޮފީސް ދޮށުގައި ހުރި ފެހިވިދުވަރުގޭ އަބްދުﷲ ފިރާގް ބުންޏެވެ
މިކަމާ ގުޅިގެން ހއ އަތޮޅުވެރިޔާ މުހައްމަދު ރަޝީދު ވިދާޅުވީ ފިއްލަދޫ އޮފީސް ހުޅުވިޔަނުދީ ރައްޔިތުން ތިބިކަމަށް ސަރުކާރުގެ ކަމާބެހޭ ފަރާތްތަކަށް އަންގާފައި ވާނެކަމަށެވެ. އަދި ސުނާމީ ފައިސާ ބަހާނެގޮތް ކަނޑައަޅުއްވަނީ ޑިޒާސްޓަރ މެނޭޖުންމަންޓުންކަމަށާއި މިކަމުގައި އަތޮޅު އޮފީސް އަދާކުރަނީ ޕޯސްޓުމޭނެއްގެ ދައުރުކަމަށެވެ
” އެފަރާތުން (ޑިޒާސްޓަރ މެނޭޖުންމަންޓުން) އަންގަވާ ގޮތަށް ފައިސާ ބަހައިދިނުމަކީ އަޅުގަނޑުމެންގެ ދައުރު, އޮފީސް ކައިރިއަށް ރައްޔިތުން އެއްވިނަމަވެސް އަތޮޅު އޮފީހުން އެބަހާނެ ގޮތަކަށް ބަދަލެއް ނުގެނެވޭނެ,“ މުހައްމަދު ރަޝީދު ވިދާޅުވި އެވެ
ފިއްލަދޫ ރައްޔިތުން ހިތްހަމަނުޖެހިގެން އުޅޭނީ ސުނާމީގައި ގެއްލުން ލިބުނު ގެތަކުގެ ތެރޭއިން ފަންގެތަކުގެ މީހުންނަށް 3،86000 ރުފިޔާ ދިނުމަށް ނިންމާފައި ރާނާފައި ހުރިގެތަކަށް މަދު ފައިސާދިނުމަށް ނިންމުމުން ކަމަށާއި ރައްޔިތުން ބޭނުންވަނީ އެންމެނަށްވެސް އެއްއުސޫލަކުން ފައިސާ ބެހުންކަމަށް ބައެއް ރައްޔިތުން މައުލޫމާތު ދެއެވެ
މިކަމާ ގުޅިގެން ޑިޒާސްޓަރ މެނޭޖުންމަންޓުން ބުނީ ސުނާމީގައި ގެއްލުން ލިބުނު ރަށްތަކަށް ފައިސާ ބަހާނެ މިންވަރު ކަނޑައަޅާނީ ކޮންޓުރަކްޝަން މިނިސްޓްރީކަމަށާއި އެފަރާތުގެ ދައުރަކީ އެފައިސާ ޖަމާކުރުން ކަމަށެވެ
މިކަމާ ގުޅޭ މައުލޫމާތު ކޮންޓްރަކްޝަން މިނިސްޓްރީން ހޯދުމަށް ގުޅުމުން ބުނީ ބޭނުންވާ މައުލޫމާތު ލިބޭނީ ފެކްސެއް ފޮނުވުމުން ކަމަށެވެ
ސުނާމީގައި ގެއްލުން ލިބުނު ފިއްލަދޫ ރައްޔިތުންނަށް ބެހުމަށް, އަތޮޅު އޮފީހުގެ ބަޖެޓަށް 14.2 މިލިއަން ރުފިޔާ ޖަމާކޮށްފައިވާކަމަށް ފިއްލަދޫ ކަތީބު އަހުމަދު ފުއާދު ވަނީ ވިދާޅުވެފައެވެ
އާބަދީގައި 950 މީހުން ދިރިއުޅޭ މިރަށުގައި މީގެ ކުރިން ތިންފަހަރެއްގެ މަތިން ފައިސާ ބެހުމަށް ނިންމާފައިވާ ގޮތާއިމެދު ރައްޔިތުން ހިތް ހަމަނުޖެހިގެން ރަށުއޮފީސް ދޮށަށް އެއްވެފައިވެ އެވެ. ނޫސް ޗާޕަށް ދިޔަ އިރުވެސް ރައްޔިތުން ތިބީ އޮފީސް ހިސާރު ކޮށްގެން ނެވެ
No comments:
Post a Comment