މިހާރު އޮތް ސަރުކާރުގެ މުއްދަތު ހަމަނުވަނީސް ގާނޫނީ ހަމަތަކުން ވަގުތީ ސަރުކާރެއް ގާއިމު ކުރެވިދާނެ: ޝާހީން
މިހާރު އޮތް ސަރުކާރުގެ މުއްދަތު ހަމަނުވަނީ ވެސް ގާނޫނީ ހަމަތަކުގެ މަތިން ވަގުތީ ސަރުކާރެއް ގާއިމުކުރެވޭނެ ކަމަށާއި އެކަމަކީ ގާނޫނީ އޮނިގަނޑުގެ ތެރޭގައި ކުރުމުގެ ފުރުސަތު އޮތްކަމެއް ކަމަށް ދިވެހި ރާއްޖޭގެ ގާނޫނީ ވަކީލުންގެ ޖަމިއްޔާގެ ރައީސް ޝާހީން ހަމީދު މިއަދު ވިދާޅުވެއްޖެ އެވެ
ޝާހީން ވިދާޅުވީ މިހާރު ހިނގާ ރިޔާސީ ދައުރު އަންނަ އަހަރުގެ ނޮވެމްބަރު 11 އަށް ހަމަނުވަނީސް ވެސް އިންތިގާލީ ސަރުކާރެއް ގާއިމުކުރެވޭނީ ހާއްސަ މަޖިލީހުން އެކަން ފާސްކުރުމަށް ފަހު ރައީސް ތަސްދީގުކުރެއްވުމުން ކަމަށެވެ
”އެ ފަދަ ބާބެއް ތަސްދީގުކޮށްފި ނަމަ ވެރިކަމުގެ ޓާމު އެ ބާބުގައި ބުނެފައިވާ އުސޫލުން ނިމުނީ. އެކަމަކީ ގާނޫނީ އެއްވެސް ހުރަހެއް އޮތް ކަމެއް ނޫން. ރައީސް އަށް ލިބޭ އިޚުތިޔާރެއް އޭނާ ބޭނުންފުޅުގޮތެއް ނިންމަވަން,“ ރައްޔިތުންގެ ޚާއްސަ މަޖިލީހުގެ ނާއިބު ރައީސްކަން ވެސް ކުރައްވާ ޝާހީން ވިދާޅުވި އެވެ
ހާއްސަ މަޖިލީހުގެ ރ. އަތޮޅު މެމްބަރުކަން ވެސް ކުރައްވާ ޝާހީން ވިދާޅުވީ ޓާމު ނުނިމެނިސް ރައީސްގެ މަގާމާއި ވަޒީރުންގެ މަގާމު ގެއްލޭގޮތަށް ގާނޫނީ ހަމަތަކުން ނުކުރެވޭނެ ކަމަށް ވިދާޅުވާ ބަޔަކު ތިއްބެވި ނަމަ އެ ވިދާޅުވާ ވިދާޅުވުންތަކަކީ ގާނޫނީ ހަމަތަކަށް ބަލާއިރު މުޅިން ރަނގަޅު ވާހަކަތަކެއް ކަމަށް ގަބޫލުނުކުރެވޭ ކަމަށެވެ
”މިސާލަކަށް ރައްޔިތުންގެ މަޖިލީހަކީ ވެސް މުއްދަތެއް ކަނޑައަޅާފައިވާ ތަނެއް. އެ މުއްދަތު ހަމަނުވަނީސް އެ މަޖިލީސް އުވާލެވޭ ނަމަ ރައީސްގެ މަގާމާއި ވަޒީރުކަން ކުރައްވާ ބޭފުޅުންގެ ޓާމު ވެސް މުއްދަތުހަމަވާ ތާރީހުގެ ކުރިން އުވާލެވޭނެ. އެއަކީ ގާނޫނީ ހަމަތަކުން ބޭރުވުމެއް ނޫން. ނަމަވެސް އެކަން ކުރެވޭނީ ގާނޫނު އަސާސީގައި އެ ބައިބައި ހިމަނައިގެން އަދި ރައީސް އެ އުސޫލުތައް ހިމެނޭ ބާބެއް ނަމަ އެ ބާބު ތަސްދީގު ކުރުމުން,“ ސިޔާސީ އެއްވެސް ޕާޓީއެއްގައި ހިމެނިވަޑައިނުގަންނަވާ ޝާހީން ވިދާޅުވި އެވެ
އޭނާ ވިދާޅުވީ އެ ފަދަ ލިއުމެއް ރައީސް މައުމޫނު ތަސްދީގުކުރައްވައިފި ނަމަ ބެލެވޭނީ ރައީސް ކަމުގެ މަގާމުގެ ބާކީ އޮތް ދުވަސްތައް އަމިއްލަފުޅަށް ދޫކޮށްލެއްވީ ކަމަށެވެ
No comments:
Post a Comment