ވަގުތީ ސަރުކާރެއް ހެދުމުގެ މަސައްކަތް ގިނަޕާޓީތަކުން ފަށައިފި
އިސްލާހް ކުރެވޭ ޤާނޫން އަސާސީ ނިމި އެއަސާސީގެ ދަށުން ސަރުކާރެއް ގާއިމް ކުރުމަށް ވަގުތީ ސަރުކާރެއް (އިންތިޤާލީ ސަރުކާރެއް) ހެދުމަށް ގިނަޕާޓީތައް އެއްބަސްވެ އެއްކޮށް މަސައްކަތް ފަށައިފި އެވެ
މިއަދު ހެނދުނު 11:30 ގައި ދަރުބާރުގޭގައި މިކަމަށް އެއްބަސްވެ މަސައްކަތް ފަށާފައިވަނީ ދިވެހިރައްޔިތުންގެ ޑިމޮކްރެޓިކް ޕާޓީއާއި އިސްލާމިކް ޑިމޮކްރެޓިކް ޕާޓީއާއި އަދާލަތު ޕާޓީގެ އިތުރުން ސަރުކާރުން ވަކިވެވަޑައިގެންނެވި ތިންވަޒީރުން ނިސްބަތްވާ ނިއުމޯލްޑިވްސް މޫވްމަންޓެވެ
މިއަދުގެ ބައްދަލުވުން ނިންމެވުމަށްފަހު ގުޅިފައިވާ ބަޔާނެއް ނޫސްވެރިންނަށް އިއްވަވާ ދެއްވަމުން އެމްޑީޕީގެ ރައީސް ޑރ މުހައްމަދު މުނައްވަރު ވިދާޅުވީ އާޤާނޫނު އަސާސީގެ ދަށުން ރައީސުލް ޖުމްހޫރިއްޔާގެ އިންތިޚާބަކާއި ރައްޔިތުންގެ މަޖިލީހުގެ އިންތިޚާބެއް ބާއްވާނިމި އިންތިޚާބުތަކުން ހޮވޭ ބޭފުޅުން މަގާމްތަކާ ހަވާލުވެވަޑައިގަންނަވަންދެން އިންތިޤާލީ ސަރުކާރެއް ހަދައިގެން އެކަން ކުރުމަށް އެއްބަސްވެވިފައިވާ ކަމަށެވެ
”މިއަދު އެއްބަސްވީ އިންތިޤާލީ ސަރުކާރު ގާއިމް ކުރުމުގެ ކަންތައްތައް ގާނޫން އަސާސީގެ ބާބެއްގައި ހިމެނުމަށް. އަދި އެބާބުގެ ބަހުސަށް ރައްޔިތުންގެ ޚާއްޞަ މަޖިލީހުން އިސްކަން ދިނުމަށް އެޅެން ހުރިހާ ބާރެއް އެޅުމަށް“ މުނައްވަރު ވިދާޅުވި އެވެ
މުނައްވަރު ވިދާޅުވީ ޕާޓީތަކުން ވަގުތީ ސަރުކާރެއް ނުވަތަ އިންތިޤާލީ ސަރުކާރަކަށް ތާއީދު ކުރަނީ ރާއްޖޭގައި މިނިވަން އިންސާފްވެރި އިންތިޚާބެއް ބެއްވުމުގެ ކަށަވަރުކަން ރައްޔިތުންނަށް ދިނުމަށާއި އެކަން އެގޮތަށް ހޯދައިގަތުމަށް ކަމަށެވެ
މިނިވަން އިންތިޚާބެއް ބޭއްވުމަށްޓަކައި ކޮންމެހެންވެސް ހުންނަންޖެހޭ މިނިވަން މުސްތަގިއްލު މުއައްސަސާތަކުގެ ވާހަކަތަކެއް ހުންނަންޖެހޭކަމަށް ޕާޓީތަކުން އެއްބަސްވެފައިވެ އެވެ
އެމުއައްސަސާތައް ވިދާޅުވެދެއްވަމުން ސަރުކާރުން އިސްތިއުފާދެއްވި ބަންޑާރަ ނައިބު ޑރ ހަސަން ސައީދު ވިދާޅުވީ ދުނިޔޭގެ އެއްވެސް ތަނެއްގައި މިނިވަން މުސްތަގިއްލު އިންތިޚާބެއް ބޭއްވުމަށް ވަރަށް މުހިއްމު އަސާސީ މުއައްސަސާތަކެއް ބޭނުންވާ ކަމަށެވެ. އަދި އެމުއައްސަސާތަކާ ނުލާ ދުނިޔޭގެ އެއްވެސް ގައުމެއްގައި އަދި އަމުދުން ދިވެހިރާއްޖޭގައި މިނިވަން އިންތިޚާބެއް ނުބޭއްވޭނެ ކަމަށް ހަސަން ވިދާޅުވިއެވެ
ޑރ ހަސަން ވިދާޅުވީ ކޮމިޝަނަރއޮފް އިލެކްޝަންސް, ހައިކޯޓް, ޕޮލިސް އިންޓަރގްރިޓީ ކޮމިޝަން އަދި އެންޓިކޮރަޕްޝަން ބޯޑު މިނިވަން މުއައްސަސާއެއްގެ ގޮތުގައި ހެދުމަށް މިއަދުގެ ބައްދަލުވުމުގައި އެއްބަސްވެވިފައިވާ ކަމަށެވެ. އަދި ސިވިލްސަރވިސް ކޮމިޝަންގެ މަސައްކަތް އަވަސް ކުރުމަށާއި ދައުލަތުގެ މީޑިޔާ މިނިވަން ކުރުން އަދި ޕްރޮސެކިއުޓަރޖެނެރަލް މުސްތަގިއްލު ކުރުމަށް އެއްބަސްވެވިފައިވާކަމަށް ހަސަން ވިދާޅުވި އެވެ
އަދާލަތު ޕާޓީގެ ރައީސް ޝައިޚް ހުސައިން ރަޝީދު އަހުމަދު ވިދާޅުވީ މިހާރު މިއޮތް ސަރުކާރު އޮވެގެން މިނިވަން ސަރުކާރެއް ނުހޮވޭނެ ކަމަށާއި އެހެންކަމުން އިންތިޤާލީ ސަރުކާރަކަށް އެޕާޓީން ތާއީދުކުރާ ކަމަށެވެ
އައިޑީޕީގެ ރައީސް އުމަރު ނަސީރު ވިދާޅުވީ އިންތިޤާލީ ސަރުކާރަކަށް ތާއީދު ކުރަނީ މިހާރު މިއޮތް ސަރުކާރުގެ އަތްމައްޗަށް އިންތިޚާބު ދޫކޮށްލައިފިއްޔާ ކުރިން އިންތިޚާބުތަކުގައި ކަންތައްތައް ހިނގާފައިވާ ގޮތަށް ކަންތައްތައް ނުހިނގާނެ ކަމުގެ އެއްވެސް ޔަޤީންކަމެއް ނެތުމުން ކަމަށެވެ
”ރައްޔިތުންގެ ހިތުގައި ހުރި ޝައްކުތައް ފިލުވާ ލެވޭނީ އިންތިޤާލީ ސަރުކާރެއް އޮވެގެން. އަދި ދެންބާއްވާ އިންތިޚާބެއްގައި ވާދަ ނުކުރާ ބަޔަކު އެ އިންތިޤާލީ ސަރުކާރުގައި ހިމެނިގެން“ އުމަރު ވިދާޅުވިއެވެ
މިހާރު އިންތިޤާލީ ސަރުކާރަކަށް ތާއީދު ނުކުރަނީ މިހާރުގެ ސަރުކާރުގެ ބޮޑުންނާއި ރައީސް މައުމޫނު ނިސްބަތްވާ ދިވެހިރައްޔިތުންގެ ޕާޓީއާއި ރީކޯ އިބްރާހީމް މަނިކުގެ ލީޑަރކަމުގައި ރަޖިސްޓްރީކޮށްފައިވާ މޯލްޑިވްސް ސޯޝަލް ޑިމޮކްރެޓިކް ޕާޓީންނެވެ
ރަޖިސްޓްރީ ކުރުމަށް ހުށަހަޅާފައިވާ އިބްރާހީމް އިސްމާއީލް (އިބުރާ) އިސްކޮސް ހުންނަވާ ސޯޝަލް ލިބަރަލް ޕާޓީންވެސް ވަނީ ވަގުތީ ސަރުކާރަކަށް ތާއީދުކުރާކަމަށް ގޮވާލައްވާފަ އެވެ. އަދި ރާއްޖޭގައި އުފެދިފައިވާ އަމިއްލަ ގިނަ ޖަމާއަތްތަކަކުންވެސް ވަނީ މިކަމަށް ތާއީދުކުރައްވާފައެވެ. އޭގެތެރޭގައި މަޑުލު ޖަމިއްޔާއާއި , ހިޔާވަހި ޖަމިއްޔާއާއި, މުސްލިމުންގެ ގުޅުން, ޓްރާންސްޕޭރެންސީ މޯލްޑިވްސް ފަދަ ޖަމްއިއްޔާތައް ހިމެނެއެވެ
ވަގުތީ ސަރުކާރެއް ހެދުމަށް ޕާޓީތައް ގުޅިގެން މިއަދު މިފެށި މަސައްކަތުގެ ދަށުން މިހަފުތާގެ ކޮންމެ ދުވަހަކުވެސް މަޝްވަރާތައް ކުރިއަށް ގެންދިއުމަށް ވަނީ ނިންމާފަ އެވެ
No comments:
Post a Comment