ދިވެހިންގެ ދިހަ މީހުން ހޯދަން ނެރުނު ރެޑް ނޯޓިސް: ދިވެހިންގެ ފަސްބައިގައި ޖެހުނު ދާއިމީ ލައްގަނޑެއް
ސަލްޓަން ޕާކުގައި ބޮން ގޮއްވާލި ހާދިސާއާ ގުޅިގެން ހޯދަން ބޭނުންވެފައިވާ 10 މީހުން ހޯދުމުގެ ރެޑް ނޯޓިސް ހުސްވި ނޮވެމްބަރު މަހުގެ 10 ވަނަ ދުވަހު އިންޓަނޭޝަނަލް ޕޮލިސް އޮގަނައިޒޭޝަން (އިންޓަޕޯލް) އިން ވަނީ ނެރެފަ އެވެ
އިންޓަޕޯލް އިން ރެޑް ނޯޓިސް ނެރުނީ ނޮވެމްބަރު 8 ވީ ބުރާސްފަތި ދުވަހު ދިވެހި ރާއްޖޭގެ ޖިނާއީ ކޯޓުން ރެޑްނޯޓިސް ނެރުމުގެ އަމުރު ދިނުމާ ގުޅިގެން ފުލުހުން އެކަމަށް އެދުމުން ނެވެ
ނަތީޖާއަކަށް ވެގެންދިޔައީ 186 ގައުމު ބައިވެރިވާ ބައިނަލް އަގުވާމީ އެންމެބޮޑު ފުލުހުންގެ ޖަމާއަތުން ޓެރަރިޒަމްގެ ކުށުގައި ދިވެހިންތަކެއް ހޯދަން ފެށުމެވެ. އެންމެ މީހެއް ނޫނެވެ. 10 މީހުން ނެވެ. 10 މީހުންވެސް ހޯދަމުން ދަނީ ޓެރަރިޒަމްގެ ކުށުގަ އެވެ
ޓެރަރިޒަމްގެ ކުށުގައި ހޯދަން ބޭނުންވެގެން މުޅި ދުނިޔެއަށް އިއުލާން ކޮށްފައިވާ 10 މީހުން ނަކީ ޓެރަރިޒަމްގެ ކުށުގައި އިންޓަޕޯލް މެދުވެރިކޮށް ހޯދާ އެހެން މީހުންނާ އަޅާބަލާއިރު ކޮންބައެއް ބާއޭ ހިތަށް އަރައެވެ
ގަބޫލު ކުރާ ހަގީގަތަކީ ސަލްޓަން ޕާކްގައި ބޮންގޮއްވާލި މީހުންގެ އަމަލަކީ ކޮންމެ ނަޒަރަކުން ބެލިނަމަވެސް ގޯސް އަމަލެއް ކަމެވެ. އަދި އެމީހުން ނަކީ ހޯދާ, އަދަބުދޭން ޖެހޭނެ ބައެއް ކަމެވެ. ޓެރަރިޒަމްގެ ދައުވާ އުފުލިދާނެ ބައެއް ކަމެވެ
ގަބޫލުކުރަންޖެހޭ އަނެއް ހަގީގަތަކީ ބޮމުގެ ހާދިސާއާ ގުޅިގެން ފުލުހުން ހައްޔަރުކުރި ނުވަތަ ހޯދާ އެންމެން ނަކީ ޓެރަރިޒަމްގެ ދައުވާ އުފުލިދާނެ މީހުން ނޫން ކަމެވެ. ޝަރީއަތުގެ މަޖިލިސްތަކުން މިބަހަށް ހެކިދޭ ކަމެވެ
ސުވާލަކީ އިންޓަޕޯލް މެދުވެރި ނުކޮށް ފިލައިގެން ދިޔަ 10 މީހުން ހައްޔަރު ކުރެވޭނެ އެހެން ގޮތެއް ނޯންނާނެ ތޯއެވެ؟ ސުވާލު އުފެދުނީ ރެޑް ނޯޓިސް ނެރުމުގެ ކުރިން އެ 10 މީހުން ލަންކާ އަށް ގޮސް, ކަރާޗީ މަގުން ޕާކިސްތާނަށް އެތެރެ ވެފައިވާކަން ފުލުހުންނަށް ޔަގީންވެފައި ވާތީ އެވެ. އެހެން ކަމަށް ވާނަމަ ޕާކިސްތާނު ފުލުހުން މެދުވެރިވެގެން އެމީހުން ހޯދުމުގެ މަސައްކަތް ކުރެވޭނެ ގޮތެއް ނޯންނާނެ ބާ އެވެ؟
މިއަދު އިންޓަޕޯލްގެ ސަބަބުން ދިވެހިން ލަދުގަންނަން ޖެހުނީ ދުނިޔެ އެއަމަލަކަށް ނަފްރަތު ކުރާ ޓެރަރިޒަމްގެ ކުށުގައި ދިވެހި ދަރިންތަކެއް ހުނި ޖެހުނީ ތީއެވެ
ޓެރަރިޒަމްގެ ކުށުގައި ހޯދަން ބޭނުންވެގެން އިންޓަރޕޯލް މެދުވެރިކޮށް ރެޑް ނޯޓިސް ނެރެފައިވާ އެންމެ ހަގު އުމުރުގެ މީހަކީ ދިވެއްސެކެވެ. އެއީ 20 އަހަރުގެ ޒުވާނެކެވެ. 20 އަހަރުން ދަށުގެ ދިވެހި އެ ޒުވާނާ ފިޔަވާ އެ އުމުރުގެ އެހެން މީހަކު ޓެރަރިޒަމްގެ ކުށުގައި އިންޓަޕޯލް މެދުވެރިކޮށެއް ނުހޯދަ އެވެ. ދުނިޔޭގެ 6 ބިލިއަން އާބާދީގެ ތެރެއިން ޓެރަރިޒަމްގެ ކުށުގައި ހޯދާ އެންމެ ހަގު އުމުރުގެ މީހަކަށް, ދިވެހި ދަރިއަކު ވުމީ ކޮންމެ ދިވެއްސަކުވެސް ލަދުގަންނަން ޖެހޭ ކަމެކެވެ
އެވަރަކުން ނުފުދެ އެވެ. ޓެރަރިޒަމްގެ ކުށުގައި ހޯދަން ބޭނުން ވެގެން ރެޑްނޯޓިސް ނެރެފައިވާ މީހުންގެ ތެރޭގައި 25 އަހަރުން ދަށުގެ ތިބީ ހަމައެކަނި ދިވެހިން ނެވެ. އޭގެ ތެރޭގައި ހިމެނެނީ ދިވެހި 6 މީހެކެވެ. މިކަމުން އެނގެނީ އިންޓަޕޯލް މެދުވެރިކޮށް ޓެރަރިޒަމްގެ ކުށުގައި ހޯދަމުންދާ އެންމެ ހަގު އުމުރުގެ މީހުން ނިސްބަތްވަނީ ދިވެހިރާއްޖެއަށް ކަމެވެ
ރާއްޖޭގެ ދިހަ މީހަކު އިންޓަޕޯލް މެދުވެރިކޮށް ހޯދަމުން ދާތީވެ ރާއްޖެ ހިމެނިފައި ވަނީ އިންޓަޕޯލް މެދުވެރިކޮށް ޓެރަރިޒަމްގެ ކުށުގައި ހޯދަން ބޭނުންވާ މީހުން 4 ވަނައަށް އެންމެ ގިނަ ގައުމަށެވެ. 3 ވަނައަށް އަންނަނީ 147 މިލިއަން މީހުން ދިރިއުޅެމުންދާ ބަނގުލަދޭޝް އެވެ. ޓެރަރިޒަމްގެ ކުށުގައި ރެޑްނޯޓިސް ނެރަފައިވާ މީހުންގެ ލިސްޓްގައި 2 ވަނައަށް ހިމެނިފައިވަނީ ދުނިޔޭގެ ދެވަނައަށް އެންމެ އާބާދީ ބޮޑު އިންޑިއާ އެވެ. އެގައުމުން 14 މީހުން އަތުލުމަށް އިންޓަޕޯލް މެދުވެރިކޮށް މަސައްކަތް ކުރަމުން ދެއެވެ. ޓެރަރިޒަމްގެ ކުށުގައި ހޯދަން ބޭނުންވާ އެންމެ ގިނަ މީހުން ނިސްބަތްވަނީ ދުނިޔޭގެ އާބާދީގެ 87 ވަނައިގައި ހިމެނޭ ޓިއުނީޝިއާ އަށެވެ. އެގައުމުގެ 33 މީހަކު ހޯދުމަށް ރެޑްނޯޓިސް ނެރެފައިވެ އެވެ
މި ހިސާބުތަކުން އެނގެނީ އާބާދީއަށް ބަލާއިރު, ޓެރެރިޒަމްގެ ކުށުގައި އިންޓަޕޯލް މެދުވެރިކޮށް ހޯދަމުންދާ އެންމެ ގިނަމީހުން ނިސްބަތްވާ ގައުމަކީ ރާއްޖެކަމެވެ
މިއީ ހަގީގަތް ބާއެވެ؟ މުޅި ދުނިޔެއަށް ބަލާއިރު ޓެރަރިޒަމްގެ ކުށުގައި ބޮޑަށް ފާހަގަވެފައިވަނީ މުސްލިމުން ނެވެ. ޓެރަރިޒަމްގެ ކުށުގައި އިންޓަޕޯލް މެދުވެރިކޮށް ހޯދަން ބޭނުންވެގެން ރެޑްނޯޓިސް ނެރެފައިވާ އެކި ގައުމުތަކުގެ 170 މީހުން ހިމެނެ އެވެ. އޭގެ ތެރެއިން 105 މީހުންނަކީ މުސްލިމް ގައުމުތަކަށް ނިސްބަތްވާ މީހުން ނެވެ. އޭގެ މާނައަކީ ޓެރަރިޒަމްގެ ކުށުގައި ހޯދާ މީހުންގެ 85 ޕަސެންޓަކީ އިސްލާމީ ގައުމުތަކަށް ނިސްބަތްވާ މީހުން ކަމެވެ. މިފަދަ އިލްޒާމެއް, ތާޖެއްގެ ސިފައިގައި އިސްލާމީ ގައުމުތަކުގެ ބޮލުގައި އަޅުވަމުންދާއިރު ދިވެހިން އެތާޖް ބަލައިގަތުމަކީ ހުރިހާ މާނައެއްގައިވެސް ދިވެހިންނަށް ލިބިގެން ދިޔަ ނިކަމެތި ކަމެކެވެ
ރާއްޖޭގެ ސަރުކާރުގެ ބޭނުންމަށް ދިވެހިންގެ ބަޔަކު ހޯދަން އިންޓަޕޯލްގެ ރެޑްނޯޓިސް ނެރުމުން ދުނިޔެއަށް ޔަގީންކޮށްދިން ކަންތައްތަކެއް އެބަހުއްޓެވެ
އެއްކަމަކީ ޓެރަރިސްޓް ހަމަލާތައް މިރާއްޖޭގައި ދޭކަމެވެ. ދެވަނަ ކަމަކީ އެފަދަ ޒުވާން ޖީލެއް މިރާއްޖޭގައި ބޮޑުވާކަމެވެ. ތިންވަނަ ކަމަކީ ޓެރަރިޒަމްގެ ކުށުގައި ހޯދަން ބޭނުން ވެފައިވާ ޒުވާނުން ދުނިޔޭގެ އެކިހިސާބު ތަކުގައި އުޅެމުންދާ ކަމެވެ. ހަތަރުވަނަ ކަމަކީ އެފަދަ ދިވެހިން ދުނިޔޭގެ އެހެން ގައުމުތަކުގައި އުޅޭކަމެވެ
ހަމައެއާއެކު ދިވެހި ރާއްޖޭގެ މީހުން ޓެރަރިޒަމްގެ އަމަލުތައް ކުށްވެރި ކުރާކަމާއި, އެފަދަ މީހުން އަތުލައިގަތުމަށް މަސައްކަތް ކުރާކަން އެނޯޓިސްއިން ދުނިޔެއަށް ހާމަވެ އެވެ
އިންޓަރޕޯލް އިން ތަފާތު ހަތް ވައްތަރެއްގެ ނޯޓިސް ނެރޭއިރު ރެޑްނޯޓިސް އަކީ މީހަކު ހޯދާ ހައްޔަރުކޮށް އޭނާ ހައްޔަރުކުމަށް އެދޭ ފަރާތާ ހަވާލުކުރުމަށް ދެވޭ ނޯޓިސްއެވެ. މިނޯޓިސް އިންޓަރޕޯލް މެދުވެރިކޮށް ރާއްޖެއިން ނެރެފައި ވާއިރު އެމީހުންގެ ކުށުގެ ބާވަތަކީ ޓެރަރިޒަމްކަން ބަޔާން ކޮށްފައި ވެއެވެ. އެ ނޯޓިސް އަކީ މީހަކު ހައްޔަރުކުރުމަށް ނެރެވޭ ބައިނަލް ނޯޓިސްއެއް ނޫނަސް އެނޯޓިސްގެ ސަބަބުން އެމީހާއާއި އެމީހާގެ ކުށުގެ ބާވަތް ދުނިޔެއަށް ހާމަވެ އެވެ. މިކަމުގެ ސަބަބުން ދިވެހިންގެ ނަމާއި ޝަރަފަށް, އިންތިހާ ދަރަޖައިގެ ހުތުރުކަމެއް ލިބިގެން ހިގައްޖެ އެވެ. އެހުތުރު ލައްގަނޑު ދިވެހިންގެ ފަސްބައިގައި ޖެހިގެން ދިޔައީ ވިސްނާނުލާ ކުރެވުނު ކަމަކުން ނެވެ. އެކަން ކުރީ ބޮންގޮއްވާލި މީހުންތޯ ނުވަތަ އެނޫން ބައެއްތޯ ސުވާލު ކުރުމުގެ ޖާގަ އެބައޮތެވެ. ނެތީ އެއަށް ދޭނެ ޖަވާބެކެވެ
No comments:
Post a Comment