މައުމޫނުގެ ދަތުރުފުޅުން ފެނިގެން އެދަނީ އިންތިގާލީ ސަރުކާރެއް ނެތި މިނިވަން އިންތިޚާބެއް ނުބޭއްވޭނެ ކަމުގެ ހެކިތައް: ޑރ.ޝަހީދު
ރައީސުލް ޖުމްހޫރިއްޔާ އަލްއުސްތާޒު މައުމޫނު ޢަބްދުލް ޤައްޔޫމް މިހާރު ރާއްޖެތެރެއަށް ކުރައްވަމުން ގެންދަވާ ދަތުރުފުޅުން ފެނިގެން އެދަނީ އިންތިގާލީ ސަރުކާރެއް ނެތި, ދެންބާއްވާ އިންތިޚާބު މިނިވަން ނުވާނެ ކަމުގެ ހެކިތަކެއް ކަމުގައި ޕާޓީތައް ގުޅިގެން އުފައްދާފައިވާ ގައުމީ އެއްބައިވަންތަކަމުގެ ގުޅުމުން (އިއްތިހާދުން) ބުނެފި އެވެ
ޖަޒީރާއަށް ދެއްވި ބަސްދީގަތުމެއްގައި އެ އިއްތިހާދުގެ އިސްތަރުޖަމާން ޑރ އަހުމަދު ޝަހީދު ބުރާސްފަތިދުވަހު ވިދާޅުވީ ރައީސް މައުމޫން މިހާރު ރާއްޖެތެރެއަށް ކުރައްވަމުން އެގެންދަވާ ދަތުރުފުޅުގައި އެމަނިކުފާނަށް ލިބިވަޑައިގަންނަވާ ބާރުގެ ބޭނުން ކުރައްވައިގެން ގައުމީ ޓީވީއާއި ގައުމީ ރޭޑިޔޯ މެދުވެރިކޮށް ރައްޔިތުންނަށް އެގެންދަވަނީ ބޮޑެތި އޮޅުވާލުންތަކެއް އޮޅުވާލައްވަމުން ކަމަށެވެ
”ހަގީގީ އިންތިގާލީ ސަރުކާރުގެ ވާހަކަ ރައްޔިތުންނަށް އެގެންދަވަނީ އޮޅުވާލައްވަމުން. އަޅުގަނޑުމެންގެ އިއްތިހާދަކުން ނޫޅެން ގާނޫނާ ޚިލާފް ކަމެއް ކުރާކަށެއް. އަދި އެފަދަކަމެއް ކުރާވާހަކައެއް އެއްވެސް އިރެއްގައި ދައްކާފައެއްވެސް ނޯންނާނެ. އިއްތިހާދުގެ މަގްސަދެއްވެސް ނޫން އެއީކީ. މިދައްކަނީ ރައްޔިތުންގެ ޚާއްޞަ މަޖިލީހުން ފާސްކޮށްގެން ގާނޫނީ ހައިސިއްޔަތު ލިބިގެން އިންތިގާލީ ސަރުކާރެއް އުފައްދާ ވާހަކަ“ ޑރ ޝަހީދު ވިދާޅުވިއެވެ
ފޮރިންމިނިސްޓަރ ކަމުން އަމިއްލައަށް ވަކިވެވަޑައިގެންނެވި ޑރ ޝަހީދު ވިދާޅުވީ ގާނޫނީ ހައިސިއްޔަތެއް ލިބެނީ ގާނޫނެއް އޮތީތީ ކަމަށާއި އާގާނޫނު އަސާސީނިމި, އެއަށް އަމަލުކުރަން ފަށާއިރު މިހާރު އަމަލުކުރާ ގާނޫން އަސާސީ އުވިގެން ދާނެ ކަމަށެވެ
”އިއްތިހާދުން މިދައްކަނީ އެވާހަކަ. މިހާރު އޮތް ގާނޫން އަސާސީ އުވުމުން އެގާނޫން އަސާސީގެ ދަށުން އުފެދިފައިވާ މުއައްސަސާތަކުގެ ގާނޫނީ ހައިސިއްޔަތު އުވިގެން ދާނެޔޭ. މުއައްސަސާތަކުގެ ގާނޫނީ ހައިސިއްޔަތު ލިބެނިކީ އެތަނެއްގައި ހުންނަ މީހަކަށެއް ނޫނޭ. އެމުއައްސަސާއަކަށޭ.“ ޝަހީދު ވިދާޅުވި އެވެ
ޑރ ޝަހީދު ވިދާޅުވީ އިންތިގާލީ ސަރުކާރެއް ބޭނުންވަނީ ބާ ގާނޫން އަސާސީ ނިމި އާ ގާނޫން އަސާސީއަށް ފެށުމުގެ ދެމެދުގެ މުއްދަތުގައި ރައްޔިތުންގެ މެދުގައި ސުލްހަމަސަލަސްކަމާއި އަމަންއާންކަން ހޯދައިދިނުމަށާއި ރައްޔިތުންގެ ޙައްގުތައް އެންމެ ފުރިހަމައަށް ރައްކާތެރިކޮށްދިނުމަށް ކަމަށެވެ
”މިހާރު މިއޮތް ގާނޫން އަސާސީ އުވުމުން މިހާރު މިއޮތް ސަރުކާރެއް ނޯންނާނެ. އެހެންވީމާ އެމުއްދަތުގައި ރައްކާތެރިކަމާއެކު ގައުމު ހިންގައިދޭނެ ބަޔަކު ކަނޑައަޅަން ޖެހޭނެ. މިނިވަން އިންތިހާބެއް ބާއްވައިދޭނެ ބަޔަކާ ގޮތްތަކެއް އެސަރުކާރެއްގައި ހިމަނަން ޖެހޭނެ. އެއަށް މިކަނީ އިންތިގާލީ ސަރުކާރެކޭ. އިންތިގާލީ ސަރުކާރަކީ އިންތިގާލީ ހަރަކާތްތަކުގައި ހިމެނޭ އެންމެކަމެއް. އެހަރަކާތްތަކުގައި އެތައްކަމެއް ހިމެނޭ. އޭގެތެރޭގައި ގައުމު ހިންގާނެގޮތާއި އިންތިޚާބު މިނިވަންކޮށް ބާއްވާނެގޮތްވެސް ހިމެނޭ’ ޑރ.ޝަހީދު ވިދާޅުވިއެވެ
ޑރ ޝަހީދު ވިދާޅުވީ މިނިވަން އިންތިޚާބެއް ބެއްވުމުގައި މީޑިޔާއަކީ ވަރަށް މުހިއްމު އެއްޗެއް ކަމަށާއި ސަރުކާރުން އެގެންދަވަނީ މިހާރުވެސް ދައުލަތުގެ މިޑިޔާ މެދުވެރިކޮށް އެމީހުން އެދޭގޮތްތައް ފަތުރާ އަދި ރައްޔިތުންނަށް ވަކިގޮތްތަކެއް ވިސްނައިދިނުމުގެ ޕްރޮޕެގެންޑާތައް ފަތުރަމުން ކަމަށެވެ
”އެއީ އިއްތިހާދުން މިދައްކާވާހަކަތައް އެއީ ހަޤީގަތެއްކަން ހާމަކޮށްދޭ ހެއްކަކީ . އިންތިގާލީ ސަރުކާރެއް ނެތި މިނިވަން އިންތިޚާބެއް ނުބޭއްވެނެކަމުގެ ހެކިތައް އެފެންނަނީ. އިއްތިހާދުގެ ވާހަކައެއް ގެނެސްދެނީކީ ނޫން. އެކަމަކު އިއްތިހާދާ ދެކޮޅަށް އިންތިގާލީ ސަރުކާރާ ދެކޮޅަށް ހަމަ ވާހަކަތައް ފަތުރާ ނަގަނީ, ރައްޔިތުންނަށް އޮޅޭގޮތަށް“ ޝަހީދު ވިދާޅުވިއެވެ
ޝަހީދު ވިދާޅުވީ ދުނިޔޭގެ އެއްވެސް ތަނެއްގެ ޑިމޮކްރަސީއެއްގައި ސިޔާސީ މީހަކު ބުނާއެއްޗެއްގެ ނޫނީ ދެއްވާ ޚިޔާލެއްގެ އަނެއްކޮޅު ހާމަނުކޮށެއް ދައުލަތުގެ މީޑިޔާއަކުން ނުގެންނާނެ ކަމަށާއި އެއީ ޑިމޮކްރަސީއާ މުޅިން ޚިލާފްކަމެއް ކަމަށެވެ
”މިހާރު އެހެނެއް ނޫން މިވަނީކީ. ޓީވީ މެދުވެރިކޮށް ރައީސްމައުމޫން ވިދާޅުވާނެ އެއްޗެއް ވިދާޅުވަނީ. އަނެއްކާ ޓީވީން އެފަދަ ވާހަކަތައްވެސް ގެންނަނީ. އޭގެ އަނެއްކޮޅު އެއްވެސް ގޮތަކަށް ނުގެނޭ. އެއީ ޑިމޮކްރަސީއާ މުޅިން ޚިލާފްކަމެއް“ ޝަހީދު ވިދާޅުވިއެވެ. ޝަހީދު ވިދާޅުވީ ދިވެހިސަރުކާރުން ގަބުލު ނުކުރެއްވިނަމަވެސް ދިވެހިރައްޔިތުން މިހާރު ވަރަށްބޮޑަށް ހޭލުންތެރިވެއްޖެ ކަމަށާއި ތަންދޮރު ދަންނަ ބަޔަކަށްވެއްޖެ ކަމަށެވެ. ”އަދިވެސް ހީކުރަނީ ރައްޔިތުންނަކީ މޮޔަބައެއް ކަމަށް. ކަންކަމުގައި ވިސްނާ ބައެއް ނޫންކަމަށް. އަދިވެސް ތިބީ ނިދާފައިކަމަށް. އެހެނެއްނޫން. މިހާރު ހޭލުންތެރިވެއްޖެ. ހަގީގަތް ހޯދާ ބަލަން ފަށައިފި“ ޝަހީދު ވިދާޅުވިއެވެ
No comments:
Post a Comment