ހިމަންދޫގައި ހިންގި މައްސަލާގައި ހިމެނޭ އެންމެންގެ ތަހުގީގު ނިމި އޭޖޭ އޮފީހަށް ފޮނުވައިފި
މިދިޔަ އޮކްޓޯބަރު މަހު 5 ވަނަ ދުވަހު އއ. ހިމަންދޫގައި ހިންގި ހަމަނުޖެހުންތަކާ ގުޅިގެން ފުލުހުން ހައްޔަރުކޮށްފައިވާ އެންމެންގެ ތަހުގީގު ނިންމައި މައްސަލަ އެޓާނީ ޖެނެރަލް (އޭޖޭ) އޮފީހަށް ފޮނުވައިފި އެވެ
މޯލްޑިވްސް ޕޮލިސް ސާރވިސްއިން ބުނީ ކުރިން އޭޖޭ އޮފީހަށް ފޮނުވިފައިވާ 61 މީހުންނާ އެކު މިހާރު ޖުމްލަ 66 މީހެއްގެ މައްސަލަ ތަހުގީގު ނިމި އެޖޭ އޮފީހަށް ފޮނުވިފައިވާ ކަމަށެވެ
ފުލުހުން ބުނީ މިމައްސަލާގައި ހައްޔަރު ކުރެވިފައިވާ މީހުންގެ ތެރޭގައި 18 އަހަރުން ދަށުގެ 5 ކުދިން ހިމެނޭކަމަށާއި އެމީހުންގެ މައްސަލަވެސް މިހާރު އޭޖޭ އޮފީހަށް ފޮނުވާފައި ވާނެ ކަމަށެވެ
ފުލުހުން މިއަދު ބުނީ އޮކްޓޯބަރ 5 ވަނަ ދުވަހު ހިންގި ހަމަނުޖެހުން ތަކަށް ފަހުގައި އެންމެ ފުރަތަމަ އެރަށުށް ހައްޔަރު ކުރެވުނު 63 މީހުންގެ އިތުރުން ތިންމީހަކު ހައްޔަރު ކުރެވިފައިވާ ކަމަށެވެ
މިމައްސަލާގައި ހިމެނޭ 16 މީހެއްގެ މައްސަލަ މިހާރުވަނީ ކޯޓަށް ފޮނުވާފަ އެވެ. އޭގެ ތެރެއިން 4 މީހެއްގެ މައްޗަށް ދައުލަތުން ވަނީ ޓެރަރިޒަމްގެ ދައުވާކޮށްފަ އެވެ
އޭޖޭ އޮފީހުން ބުރާސްފަތި ދުވަހު ބުނީ ކޯޓަށް ފޮނުވާފައިވާ 16 މީހުންގެ ތެރެއިން 8 މީހުންނަކީ ރަށުން ބޭރު މީހުން ކަމަށެވެ
އއ. ހިމަންދޫގައި ދިވެހިރާއްޖޭގެ ސަލާމަތީ ބާރުތަކާއި އެރަށުގައި ވަކިޖަމާއަތް ހަދައިގެން ނަމާދުކުރަމުން ދިޔަ މީހުންނާ ދެމެދު ހިނގި ކުރިމަތި ލުމުގައި ގިނައަދަދެއްގެ ބަޔަކަށް އެކިވަރުގެ އަނިޔާތައް ވެގެންދިޔަ އެވެ
No comments:
Post a Comment