ވިސްނުމުގެ ދާއިރާ ފުޅާކޮށް، ފިކުރު ހިންގުމުގެ އުދަރެސް މިހާރަށްވުރެ ތަނަވަސްކުރުމަށް، ރާއްޖޭގެ ރައްޔިތުންނަށް ރައީސުލްޖުމްހޫރިއްޔާ ގޮވާލައްވައިފި
ވިސްނުމުގެ ދާއިރާ ފުޅާކޮށް، ފިކުރު ހިންގުމުގެ އުދަރެސް މިހާރަށްވުރެ ތަނަވަސް ކުރުމަށް، ރާއްޖޭގެ ރައްޔިތުންނަށް އަލްއުސްތާޛު މައުމޫން ޢަބްދުލްޤައްޔޫމް ގޮވާލައްވައިފިއެވެ. ރައީސުލްޖުމްހޫރިއްޔާ މިކަމަށް ގޮވާލެއްވީ، ނަޞްރުގެ ދުވަހުގެ މުނާސަބަތުގައި، މިރޭ ޖުމްހޫރީ މައިދާނުގައި ބޭއްވެވި އިޙްތިފާލުގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާ ވިދާޅުވިގޮތުގައި، ކޮންމެ މީހަކުވެސް ވިސްނަންވާނީ، އެމީހެއްގެ އަމިއްލަ ނަފްސާއި އެމީހެއްގެ ޢާއިލާއާ ދޭތެރެއަކު ނޫނެވެ. އެމީހެއްގެ އަމިއްލަ އަވަށާއި އަމިއްލަ ރަށާ ދޭތެރެއަކު ނޫނެވެ. ކޮންމެ މީހަކުވެސް ވިސްނަންވީ، އެއަށްވުރެ ފުޅާކޮށް މުޅި ޤައުމާ ދޭތެރޭގައެވެ. އަޅުގަނޑުމެން ވިސްނަންވީ، މިއަދު އަޅުގަނޑުމެންނަށް ދިމާވެފައިވާ ކަމެއް ނުވަތަ މާދަމާ ދިމާވާނެ ކަމެއް ޙައްލުކުރުމަކަށް ނޫން ކަމަށާއި، އަޅުގަނޑުމެން ވިސްނަންވީ މިއަދަށާއި، މާދަމައަށާއި، އަންނަން އޮތް ޖީލުތަކަށް އެންމެ އެކަށީގެންވާ ގޮތަކީ ކޮބައިތޯ ބަލައި، އެގޮތަކަށް ޢަމަލުކުރުމަކަށް ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އަޅުގަނޑުމެން ކޮންމެ ކަމެއްވެސް ކުރަންވާނީ، ދުރު ރާސްތާއަށް ވިސްނާފައި، މުޅި ރާއްޖޭގެ ރައްޔިތުންނަށާއި އަންނަން އޮތް ޖީލުތަކަށް ލާބަ ލިބޭނެ ގޮތެއްގެ މަތިން ކަމަށާއި، މިފަދަ އިޞްލާޙީ ބަދަލުތަކެއް ޤައުމަށް އަންނަ ދަނޑިވަޅެއްގައި، މިގޮތަށް ވިސްނުން ގެންގުޅުމަކީ، ވަރަށް މުހިންމު ކަމެއް ކަމުގައި ވިދާޅުވިއެވެ. ހަމައެޔާއެކު، ޤައުމުގެ އެއްބައިވަންތަކަން އިތުރަށް ބަދަހިކޮށް، އަޅުގަނޑުމެންގެ މެދުގައި އެކުވެރިކަމުގެ ގުޅުން އިތުރަށް ވަރުގަދަ ކުރުމުގެ ޢަޒުމް އާކުރުމަކީވެސް މިފަދަ ކޮންމެ މުނާސަބަތެއްގައި ކުރަންޖެހޭނެ ކަމެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ބިރުވެރި ހާދިސާއަށް ބައްލަވާލައްވަމުން، އެއީ ރާއްޖޭގެ ފަތުގެ ތާރީޚު ދުށް އެންމެ ނުރައްކާތެރި ދުވަސް ކަމަށް ވިދާޅުވިއެވެ. އަދި ނޮވެމްބަރު މަހުގެ 3 ވަނަ ރޭގެ ފަތިހު 4.30 ން ފެށިގެން ނޮވެމްބަރ މަހުގެ 4 ވަނަރޭގެ ފަތިހު 4.30އާ ދެމެދު ހިނގާދިޔަ 24 ގަޑިއިރަކީ، ރައީސުލްޖުމްހޫރިއްޔާގެ ޙަޔާތްޕުޅުގައި އައި އެންމެ ބިރުވެރި ނުރައްކާތެރި 24 ގަޑިއިރު ކަމުގައި ވިދާޅުވިއެވެ. އެދުވަހު ރާއްޖެއަށް ލިބުނު ފަތަޙައާއި ނަޞްރަކީ، މާތްﷲގެ ހެޔޮ ރަޙްމަތްފުޅުން ލިބުނު ފަތަޙައަކާއި ނަޞްރެއް ކަމަށް، ރައީސުލްޖުމްހޫރިއްޔާ ވިދާޅުވިއެވެ. އަދި އެދުވަހު ދިވެހި ސިފައިންނާއި ދިވެހި ރައްޔިތުން އެކުރެއްވި މަތިވެރި ޖިހާދުގެ ހަނދާން އާކުރައްވަމުން، ދިވެހި ސިފައިންނަށާއި ދިވެހި ރައްޔިތުންނަށް ޙައްޤުވެގެންވާ ޝުކުރު އެމަނިކުފާނު އަދާކުރެއްވިއެވެ. ހަމައެޔާއެކު، އެދުވަހު އިންޑިޔާ ސަރުކާރުން ވެދެއްވި އަވަސް އަދި ފުރިހަމަ އެހީއަށްޓަކައި، އިންޑިޔާ ސަރުކާރަށާއި އިންޑިޔާ ސިފައިންނަށާއި ރައްޔިތުންނަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.
މި އިޙްތިފާލުގައި މަރްޙަބާ ދެންނެވުމުގެ ގޮތުން، މިނިސްޓަރ އޮފް ހޯމްއެފެއާޒް އަލްފާޟިލް ޢަބްދުﷲ ކަމާލުއްދީން ދެއްކެވި ވާހަކަފުޅުގައި، ނޮވެމްބަރު 3ގެ ނަޞްރަކީ މާތްﷲގެ ހެޔޮ ރަޙްމަތްފުޅުން ލިބުނު ނަޞްރެއް ކަމަށާއި، އަދި އެދުވަހު ލިބުނު ކާމިޔާބީއަކީ، ދިވެހި ދަރިންތަކެއް ދިވެހި ޤައުމަށްޓަކައި ފުރާނައިން ޤުރްބާންވުމަށް ތައްޔާރަށް ތިބުމުގެ ނަތީޖާ ކަމުގައި ވިދާޅުވިއެވެ. އަދި އެދުވަހުގެ ހާދިސާގައި، ދިވެހި ޤައުމާއި ދިވެހި ރައްޔިތުންގެ ސަލާމަތަށްޓަކައި، ރައީސުލްޖުމްހޫރިއްޔާ ރޭއްވެވި ރޭއްވެވުމާއި، ކުރައްވަމުން ގެންދެވި މަސައްކަތްޕުޅުތައް މިނިސްޓަރ ޢަބްދުﷲ ކަމާލުއްދީން ފާހަގަކުރައްވައި، ރައީސުލްޖުމްހޫރިއްޔާއަށް ޝުކުރު އަދާކުރެއްވިއެވެ. ނޮވެމްބަރު 3ގެ ބިރުވެރިކަން ފިލާ ދިޔައިރު، އެހެން ސިފައެއްގައި ޓެރަރިޒަމްގެ ބިރުވެރިކަން އަޅުގަނޑުމެންނަށް ވަނީ ކުރިމަތިވެފައި ކަމުގައިވެސް އެމަނިކުފާނު ވިދާޅުވިއެވެ.
މި އިޙްތިފާލުގައި 3 ނޮވެމްބަރ 1988 ގައި ޝަހީދުވި ބޭފުޅުންގެ ހަނދާނުގައި ސުކޫތެއް ގެންނެވިއެވެ. އަދި ދުވަހާ ގުޅޭގޮތުން މޯލްޑިވްސް ނޭޝަނަލް ޑިފެންސް ފޯހުން ތައްޔާރުކޮށްފައިވާ ވީޑިއޯ ލަވައެއްވެސް ދެއްކިއެވެ. އިޙްތިފާލް ނިމިގެންދިޔައީ ޚާއްޞަ ދުޢާއަކުންނެވެ. އިސްވެ ދުޢާ ވިދާޅުވެދެއްވީ، ކީރިތި ޤުރްއާނާބެހޭ މަރްކަޒުގެ އެސިސްޓެންޓް އެގްޒެކެޓިވް ޑިރެކްޓަރ ފަޟީލަތުއްޝައިޚު ޢުޘްމާން ޢަބްދުﷲ އެވެ.
No comments:
Post a Comment