ރިޔާޒް ރަޝީދުގެ ކަރުފުޅުގައި ރައްޔިތުންގެ މަޖިލީހުގެ ރައީސް ހިއްޕެވި މައްސަލަ ކޯޓަށް ހުށަހަޅައިފި
ރައްޔިތުންގެ ޚާއްޞަ މަޖިލީހުގެ ތ އަތޮޅު މެންބަރ ރިޔާޒު ރަޝީދުގެ ކަރުފުޅުގައި ރައްޔިތުން މަޖިލީހުގެ ރައީސް އަދި ރައްޔިތުންގެ ޚާއްޞަ މަޖިލީހުގެ ރައީސުލް ޖުމްހޫރިއްޔާގެ މެމްބަރު އަހުމަދު ޒާހިރު (ސީނާ ޒާހިރު) ހިއްޕެވި މައްސަލަ މިއަދު ކޯޓަށް ހުށަހަޅައިފި އެވެ
މަދަނީ ކޯޓަށް ރިޔާޒު ރަޝީދު ހުށަހެޅުއްވި މައްސަލައިގައި ވިދާޅުވެފައިވަނީ ” 2 ސެޕްޓެމްބަރު 2007 ދުވަހު ހެނދުނު ރައްޔިތުންގެ މަޖިލިސްކުރާ ގޭގެ ތަޅުމުގައި މ.ސީނާ އަހުމަދު ޒާހިރު އަޅުގަނޑުގެ ގަޔށް އަތްލާ އަޅުގަނޑުގެ ކަރުގައި ހިފާ މާރާމާރީ ހިންގާފައިވާތީ އަޅުގަނޑަށް ލިބިފައިވާ މަދަނީ ގެއްލުމުގެ ބަދަލު ހޯދުމަށް ދައުވާ ކުރަމެވެ.“ ކަމަށެވެ.
ރައްޔިތުން މަޖިލީހުގެ ރައީސް, މ.ސީނާ ޒާހިރާއި ދެކޮޅަށް ކޮށްފައިވާ ދައުވާގެ ހެކިންގެ ގޮތުގައި 5 ބޭފުޅެއްގެ ނަން ހުށަހަޅުއްވާ ފައި ވެއެވެ. އެބޭފުޅުންނަކީ ރައްޔިތުންމަޖިލީހުގެ އައްޑު އަތޮޅު މެމްބަރު މުހަންމަދު އަސްލަމާއި, ރައްޔިތުން މަޖިލީހުގެ ކ.އަތޮޅު މެމްބަރު މާރިޔާ އަހުމަދު ދީދީ އާއި ރައްޔިތުން މަޖިލީހުގެ ޅ. އަތޮޅު މެމްބަރު އިބުރާހިމް އަހުމަދު ޞާލިހާއި ރައްޔިތުންގެ ޚާއްޞަ މަޖިލީހުގެ ބ. އަތޮޅު މެމްބަރު އަލީ ފާއިޒާއި ޚާއްޞަ މަޖިލީހުގެ އދ. އަތޮޅު މެމްބަރު އިލިޔާސް ހުސައިން އިބުރާހިމެވެ
ރައްޔިތުންގެ ޚާއްޞަ މަޖިލީހުގެ ޖަލްސާގައި ހިނގާ ދިޔަ ހާދިސާއަކާ ގުޅިގެން މަޖިލީސް ހުއްޓަވާލެއްވިފަހުން ހިނގި މިހާދިސާގައި ރިޔާޒު ގެ ކަރުގައި ޒާހިރު ހިއްޕެވިކަން ރިޔާޒުވަނީ ޖަޒީރާއަށް ކަށަވަރު ކޮށްދެއްވާފަ އެވެ
"އަޅުގަނޑުގެ ކަރުގައި ރައްޔިތުންގެ މަޖިލީހުގެ ރައީސް ހިފީ އަޅުގަނޑު ގޮސް ބުނީ ޒާހިރު ކުރާ ކަމެކޭ ސިފައިން ވައްދައިގެން މެންބަރުންނަށް އަނިޔާ ކުރަނީ. އެހެން ބުނީމާ ކަރުގައި ހިފީ. ހިފާފައި ބޯ.....ދީފައި ގައިގައި އަޅާ ކޮއްޕާލާފައި ބުނީ ނުކުންނާށޭ. އެމަންޒަރު އަސްލަމަށާއި އަލީފާއިޒަށާއި އިލްޔާސް ހުސައިން އަދި އިބުރާހީމް މުހައްމަދު ސާލިހަށް ފެނިވަޑައިގަންނަވާނެ" ރިޔާޒު ވިދާޅުވިއެވެ
މާރިޔާ ވިދާޅުވީ ޒާހިރު ރިޔާޒުގެ ކަރުގައި ހިއްޕެވިތަން ފެނިވަޑައިގެންނެވި ކަމަށެވެ
އަސްލަމް ވިދާޅުވީ ކަރުގައި ހިއްޕެވިތަން ފެނިވަޑައި ނުގަންނަވާ ކަމަށާއި ނަމަވެސް ބުރަކަށީގައި އަޅާ ކޮއްޕަމުން ގެންދެވިތަން ފެނިވަޑައިގަތް ކަމަށެވެ
"އަޅުގަނޑު އޭރު ހުރީ އެމީހުންނަށް ފޭސްކޮށްގެންނެއް ނޫން. އެނބުރިލިވަގުތު ފެނުނީ ކޮއްޕަމުން ދިޔަތަން. ރިޔާޒުވެސް އިނގިލި ދިއްކުރައްވަމުން ކޮންމެވެސް އެއްޗެހިތަކެއް ޒާހިރާ ދިމާލަށް ވިދާޅުވަމުން ގެންދެވި. އެއީ ކޮން އެއްޗިއްސެއް ކަމެއް ނޭނގޭ" އަސްލަމް ވިދާޅުވިއެވެ
އަލީ ފާއިޒް ވިދާޅުވީ އެމަންޒަރު ފެނިވަޑައިގަތް ކަމަށެވެ
"ހަމައެކަނި ކަރުފުޅުގައި ހިއްޕެވީ އެއްނޫން. ބުރަކަށީގައި އަޅާ ކޮއްޕަމުން އަދި އަތްޕުޅުގައި ހިއްޕަވާ ނުކުންނާށޭ ބުނާގޮތަކަށް ޒާހިރު ހައްދަވަމުން ގެންދެވި. ޒާހިރު ހުންނެވީ ވަރަށް ބޮޑަށް ކޯފާ ވެފައި" އަލީ ފާއިޒް ވިދާޅުވި އެވެ
އިބްރާހީމް މުހައްމަދު ސާލިޙް ވިދާޅުވީ އޭނާ ޗެމްބަރ ތެރެއަށް ވެންނެވިއިރު ރިޔާޒް ބޭރަށް ވަޑައިގަތުމަށް ޒާހިރު އަންގަވަމުން ގެންދާ ކަމަށާއި އޭރު ޒާހިރުގެ އަތްޕުޅުން ރިޔާޒުގެ ކޮނޑުފުޅުގައި އަޅުއްވާ ކޮއްޕަވަމުން ގެންދެވި ކަމަށެވެ
އިލްޔާސް ވިދާޅުވީ ޒާހިރު ހުންނެވީ ވަރަށް ބޮޑަށް ކޯފާ ވެފައި ކަމަށާއި ރިޔާޒްގެ ކޮނޑުފުޅުގައި އަޅާ ތިންފަހަރު ވަރަށް ބާރަށް ކޮއްޕަވާލެއްވިތަން ފެނިވަޑައިގެން ކަމަށެވެ. ނަމަވެސް ސީދާ ކަރުގައި ހިއްޕެވިތަނެއް ފެނިވަޑައި ނުގަންނަވާ ކަމަށް އެނާ ވިދާޅުވި އެވެ
މިކަމާ ގުޅިގެން ސީނާ ޒާހިރު ވިދާޅުވީ އޭނާ އެގޮތަށް އެކަން ނުކުރައްވާ ކަމަށެވެ
"އަސްލު ވީގޮތަކީ ރިޔާޒާއި އެހެން މެންބަރަކާ ދެބޭފުޅުން އަޅުގަނޑާ ދިމާލަށް އެއްޗެހި ކިޔަމުން އައީ. އައިމާ އަޅުގަނޑު ރިޔާޒުގެ ބުރަކަށީގައި އަތްއަޅާފައި ބުނިން ނުކުންނާށޭ. ބުނީމާ ބުނީ ތިމަންނަ ގަޔަށް ނާރާށޭ. ދެން އަޅުގަނޑު ހުއްޓާލީ. އޭނާ އެއްޗެހި ކިޔަމުން ދިޔައީ. އަޅުގަނޑު އަނގަޔަކުން ނުބުނަން. ނުކުންނާށޭ ބުނުން ނޫން އެހެން އެއްވެސް ލަފުޒެއް ނުބުނަން. އަޅުގަނޑު ދެން ނިކުމެގެން ލިފްޓަށް އަރަން އުޅުމުން ހުރަސްއަޅާހެދި އެހެން މެންބަރަކުވެސް. އޭރުވެސް އަޅުގަނޑު އެއްޗެއް ބުނިނަމަ އަޅުގަނޑުމެންގެ ސެކިއުރިޓީންނަށް އެނގޭނެ" ޒާހިރު ވިދާޅުވި އެވެ
ރިޔާޒާ މުޚާތަބުކޮށް ހަޑި ހުތުރު ބަސްތަކެއް ބޭނުން ކުރިކަމަށް ރިޔާޒު ވިދާޅުވާކަމަށް ދެންނެވުމުން ޒާހިރު ވިދާޅުވީ ޒާހިރު އެނގިވަޑައިގަންނަވާ މީހެއް ނަމަ އެފަދަ އިބާރާތެއް ބޭނުން ނުކުރާނެކަން އެނގޭނެ ކަމަށެވެ
"އަޅުގަނޑު ދަންނަ މީހަކަށް ވިއްޔާ އެނގޭނެ އަޅުގަނޑު އެފަދަ އިބާރާތެއް ބޭނުން ނުކުރާނެ ކަމަށް. އަދި އޭނާގެ ކަރުގައި ހިފިނަމަ އަޅުގަނޑަކީ އޭނާއަށްވުރެ ދެގުނަ ދޮށީ މީހެއް. އެފަދަ ކަމެއް ކުރި ނަމަ އަޅުގަނޑު އޮންނާނީ ގޮނޑިދަށުގައި ކަންނޭނގެ" އަހުމަދު ޒާހިރު ވިދާޅުވި އެވެ
Velidhoo News
Courtesy: Jazeera Daily
No comments:
Post a Comment