ނޫސް ބަޔާން ނަންބަރު
NR - 035/2007 A
ތާރީޚު: 05 ސެޕްޓެމްބަރ 2007
ރައްޔިތުންގެ މަޖިލީހުގެ ޢިއްޒަތްތެރި ރައީސް އަދި ރައްޔިތުންގެ ޚާއްޞަ މަޖިލީހުގެ ރައީސުލް ޖުމްހޫރިއްޔާގެ މެންބަރު އަލްފާޟިލް އަޙްމަދު ޒާހިރާއި، އެމަނިކުފާނު މަސައްކަތްކުރައްވާ މުއައްސަސާގެ ޤަދަރު ކުޑަކުރުމަށް ބަޔަކު ގަސްދުގައި ރާވައިގެން ހިންގާފައިވާ ޢަމަލުތައް ދިވެހި ރައްޔިތުންގެ ޕާޓީން ކުށްވެރިކުރޭ
ރައްޔިތުންގެ މަޖިލީހުގެ ޢިއްޒަތްތެރި ރައީސް އަދި ރައްޔިތުންގެ ޚާއްޞަ މަޖިލީހުގެ ރައީސުލް ޖުމްހޫރިއްޔާގެ ޢިއްޒަތްތެރި މެންބަރު އަލްފާޟިލް އަޙްމަދު ޒާހިރުގެ މައްޗަށް ބަޔަކު އިލްޒާމްތަކެއް އަޅުވާ، އެމަނިކުފާނާއި އެމަނިކުފާނު މަސައްކަތްކުރައްވާ މުއައްސަސާގެ އަގުވައްޓާލާ، ޤަދަރު ކުޑަކޮށްލުމަށްޓަކާ ގަސްތުގައި ރާވައިގެން މި ސެޕްޓެމްބަރު މަހުގެ 2 ވީ އާދީއްތަ ދުވަހު ރައްޔިތުންގެ ޚާއްޞަ މަޖިލީހުގެ ޖަލްސާ އަށް ފަހު ހިންގާފައިވާ ނާތަހްޒީބީ އަދި އަޚުލާޤީ ގޮތުން ދަށްފެންވަރުގެ ޢަމަލުތައް ދިވެހި ރައްޔިތުންގެ ޕާޓީން ކުށްވެރިކުރަމެވެ.
އަލްފާޟިލް އަޙްމަދު ޒާހިރަކީ ގިނަދުވަސްތަކެއް ވަންދެން ރައްޔިތުންގެ މަޖިލީހުގެ ގދ. އަތޮޅުގެ ޢިއްޒަތްތެރި މެންބަރެއްގެ ގޮތުން ރައްޔިތުންގެ ފައިދާއާއި ލާބައަށްޓަކާ އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. އަދި އެމަނިކުފާނަކީ މިހާރުވެސް ރައްޔިތުންގެ މަޖިލީހުގެ ރައީސްގެ ހައިސިއްޔަތުން ރައްޔިތުންނަށް އިޚްލާޞްތެރިކަމާއި އެކު ޚިދުމަތްތަކެއް ކުރައްވަމުންގެންދަވާ، ރައްޔިތުންގެ ފުރިހަމަ އިތުބާރާއި، ލޯތްބާއި، އިޙްތިރާމް ލިބިވަޑައިގެން ހުންނެވި ރައްޔިތުންގެ ހައްޤުގައި ސާބިތުކަމާއި އެކު ވަކާލާތު ކުރައްވާ ރައްޔިތުންގެ ހައްޤުތަކަށް ރައްކާތެރިވެ ވަޑައިގެން ހުންނެވި ބޭފުޅެއްކަން ރާއްޖޭގެ ލޮބުވެތި ރައްޔިތުން ޤަބޫލު ކުރައްވާނެއެވެ.
މީގެ އިތުރުން އަލްފާޟިލް އަޙްމަދު ޒާހިރަކީ މިވަގުތު ދިވެހިރާއްޖެ ދެކެމުންމިދާ ހަލަބޮލި ސިޔާސީ އޮއިވަރުގެ ތެރޭގައިވެސް ވަރަށް އިންސާފުވެރިކަމާއި، ކެތްތެރި ކަމާއި އަދި އެހާމެ ޤާބިލުކަމާއި އެކު ރައްޔިތުންގެ މަޖިލީހުގެ ރައީސްގެ މަސްއޫލިއްޔަތާއި، ވާޖިބު ތައް އަދާ ކުރައްވަމުންގެންދަވާ، ޤައުމަށް ނުހަނު ވަފާތެރި ބޭފުޅެއްކަން ދިވެހިރައްޔިތުން ޤަބޫލު ކުރާ ކަންވެސް ޔަޤީނެވެ.
އަލްފާޟިލް އަޙްމަދު ޒާހިރުގެ އިސްތަށިފުޅުގައި ހަޤީޤަތެއްނެތް ވާހަކަތަކެއްގެ މައްޗަށް ބިނާކޮށް ދޮގު އިލްޒާމް ތަކެއް އަޅުވާ، އެމައްސަލަ ކޯޓަށް ހުށަހެޅި ބަޔެއްގެ ބޭނުމަކަށް ވެފައިވަނީ ދިވެހި ރައްޔިތުންނަށް އޮޅުވާލާ، އެމަނިކުފާނުގެ އަބުރާއި ކަރާމާތަށް އަރައިގަތުން ކަން މިޕާޓީން ޤަބޫލު ކުރަމެވެ. ދިވެހި ޤައުމަށް އަގުނުކުރެވޭ ފަދަ ޚިދުމަތްތަކެއް ކޮށްދެއްވަމުން ގެންދަވާ އަލްފާޟިލް އަޙްމަދު ޒާހިރުއާއި އެކު ދިވެހި ރައްޔިތުންގެ ޕާޓީ، ސާބިތުކަމާއި އެކުގައި ވާކަން މިފުރުޞަތުގައި ދަންނަވަމެވެ
VELIDHOO NEWS
velidhoocommunity@gmail.com
velidhoocommunity@gmail.com
No comments:
Post a Comment