އެޓާނީ ޖެނެރަލްކަމަށް ބޭފުޅަކު އައްޔަނު ކުރައްވާފައިވާ ކަމަށާއި ރައީސް ވަޑައިގަތުމުން މަގާމުގެ ހުވާ ކުރައްވާނެކަމަށް އިންފޮމޭޝަން މިނިސްޓަރު ވިދާޅުވެއްޖެ
އެޓަނީ ޖެނެރަލްގެ މަގާމުން ޑރ.ހަސަން ސައީދު މިދިޔަ މަހުގެ 5 ވަނަ ދުވަހު އިސްތިއުފާދެއްވި ފަހުން އާ މިނިސްޓަރަކު ހަމަނުޖައްސަވާ ވަނީ އެމަގާމަށް އެކަށިގެންވާ ބޭފުޅަކު ނުލިބިގެން ނޫން ކަމަށް އިންފޯމޭޝަން މިނިސްޓަރ މުހައްމަދު ނަޝީދު ވިދާޅުވެއްޖެ އެވެ
އިންފޯމޭޝަން މިނިސްޓަރގެ އަމިއްލަ ފުޅު ސައިޓްގައި އިއްޔެ ވިދާޅުވީ އެޓަނީ ޖެނެރަލް ކަމުގެ މަގާމަށް އެކަށީގެންވާ ބޭފުޅުން މިހާރުވެސް ސަރުކާރުގައި ތިއްބެވިކަމަށާއި އަދި އެޓާނީ ޖެނެރަލްކަން ދެއްވުމަށް ބޭފުޅަކުވެސް ހަމަޖެހިފައިވާ ކަމަށެވެ
"ސަރުކާރުން ވަނީ ދެން އެޓާނީ ޖެނެރަލްކަން ކުރައްވާނެ ބޭފުޅެއް ހަމަޖައްސަވާފައި. މަގާމުގެ ހުވާކުރުން އޮންނާނެ ރައީސް ރާއްޖެ ވަޑައިގަތުމާ އެކު" ނަޝީދުގެ ސައިޓްގައި ވިދާޅުވެފައި ވެއެވެ
ނަޝީދު ވިދާޅުވީ ބައެއް ފަރާތްތަކުން ދެކެމުން އަންނަނީ އެޓަރނީ ޖެނެރަލްކަން ދެން ކުރައްވާނީ އެމަނިކުފާނު ކަމަށެވެ. އެކަމަކު އެމަނިކުފާނު އެކަމާ އެއްބަސްވެ ވަޑައިނުގަންނަވާނެ ކަމަށާއި އަދި ސަރުކާރުން އެފަދަ ކަމެއް މިހާތަނަށް ހުށަހަޅާފައިވެސް ނުވާކަމަށެވެ
ޖަޒީރާއަށް ވަރަށް މުއުތަބަރު ފަރާތަކުން މައުލޫމާތު ލިބިފައިވާ ގޮތުގައި އާ އެޓާނީ ޖެނެރަލްކަމުގެ މަގާމަށް ހަމަޖައްސަވާނީ ހޯމްމިނިސްޓްރުގެ ނައިބުކަން ކުރައްވަމުން ގެންދަވާ އައިޝަތު އާޒިމާ ޝުކޫރެވެ
ކުރީގެ އެޓަނީ ޖެނެރަލް ކަމުގެ މަގާމުގައި ހުންނެވި ޑރ.ހަސަން ސައީދު ސަރުކާރުން އިސްތިއުފާދެއްވާފައިވަނީ ސަރުކާރުގެ އިޚްލާސްތެރިކަމެއް ނެތްކަމަށް ވިދާޅުވެ އެވެ. އެމަނިކުފާނާއި އެކު ޖަސްޓިސް މިނިސްޓަރ މުހައްމަދު ޖަމީލުވެސް ވަނީ އިސްތިއުފާ ދެއްވާފައެވެ. އަދި އޭގެ ފަހުން ހާރިޖީ ވަޒީރު ޑރ.އަހުމަދު ޝަހީދުވެސް ވަނީ ވަޒީރުކަމުން އިސްތިއުފާ ދެއްވާފަ އެވެ
Report: Velidhoo News
velidhoocommunity@gmail.com
No comments:
Post a Comment