ރައީސް މައުމޫނުގެ ފޮޓޯއަކަށް ބިސްޖެހުމަށް ފަހު ހުޅުޖަހައިފި
ކަލާފާނު ސުކޫލުގައި ރޭ ބޭއްވި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އާއްމު ބައްދަލުވުމަށް ފަހު އެބައްދަލު ވުމުގައި ބައިވެރިވި މީހުން ރާއްޖޭގެ ރައީސުލް ޖުމްހޫރިއްޔާ އަލްއުސްތާޛް މައުމޫން އަބުދުލް ގައްޔޫމްގެ ފޮޓޯއަކަށް ބިސްޖަހައި އެފޮޓޯގައި ހުޅުޖަހައިފި އެވެ
މިހާދިސާ ހިންގާފައިވަނީ ރޭ ގާތްގަނޑަކަށް 11 ޖަހައި އެހައިކަން ހާއިރު ކުޑަކުދިންގެ ޕާކް ކުރިމަތީގައި ބަހައްޓާފަ އެވެ. އަދި ކޭހަކަށް ވުރެ ގިނަ ބިސް މައުމޫނުގެ ފޮޓޯއަށް ޖެހި އެވެ
މިފޮޓޯއަކީ ކަރުދާހަށް ޕްރިންޓްކޮށްފައިވާ 3 ފޫޓްގެ ފޮޓޯ އެކެވެ. ފޮޓޯ ހަރުކޮށްފައިވަނީ ފްލައިވުޑުން ހަދާފައިވާ ސްޓޭންޑެއްގަ އެވެ
ރައީސްގެ ފޮޓޯއަށް ގިނަ އަދަދެއްގެ ބިސްޖަހާ ހެދުމުގެ ސަބަބުން ފޮޓޯގައި ހުޅުޖެހިނަމަވެސް އެހާ އަވަހަށް ފޮޓޯ އަނދާފައެއް ނުވެއެވެ. ފަހުން އެފޮޓޯއަށް ވީނުވީ އެއް ނޭނގުނެވެ
މީގެ އިތުރުން އެސަރަހައްދުގައި މިހަރަކާތް ހިންގަމުން ދަނިކޮށް އެހިސާބުގަނޑު ޕެޓްރޯލް ކުރަމުން ސައިކަލްގައި ދިޔަ ދެފުލުހަކަށް އެސަރަހައްދުގައި ހަރަކާތްތެރިވި މީހުން ވަނީ ހަމަލާދީފަ އެވެ
އަދި އެދެފުލުހުން ދުއްވަމުން ދިޔަ ސައިކަލުގެ ނަމްބަރު ބޯޑުގެ ބައެއް ނައްޓާލައި އޭގެން ފުލުހަކަށް ހަމަލާދީފައި ވެއެވެ
އެދެފުލުހުންނަށް ހަމަލާ ދޭން ފެށުމުން އެސަރަހައްދުގައި ހަރަކާތްތެރިވި މީހުންގެ ތެރެއިން ބަޔަކު ވަނީ ފުލުހުންނަށް ހަމަލާ ދިނުމަށް ހުރަސް އަޅާ އެފުލުހުން ހިމާޔަށް ކޮށްދީފަ އެވެ
މިހާދިސާ އެސަރަހައްދުގައި ހިންގިތާ 20 ވަރަކަށް މިނެޓް ވެސް ނުވަނީސް ފުލުހުންގެ ޓީމެއް އެސަރަހައްދަށް ގޮސް އެސަރަހައްދުގައި ތިބި މީހުން ފޮނުވާލާފައިވެ އެވެ. އަދި އެސަރައްދު ޕެޓްރޯލް ކުރަން އުޅެނިކޮށް އަނިޔާލިބުނު ދެފުލުހުން ގެންދިޔަ އެވެ
އެމްޑީޕީގެ ރައީސް ޑރ.މުހަންމަދު މުނައްވަރު ވިދާޅުވީ އެކަމަކީ އެމްޑީޕީން ރާވައިގެން ހިންގި ކަމެއް ނޫން ކަމަށެވެ
ފުލުހުން ބުނީ މިމައްސަލާގައި އެއްވެސް މީހަކު ފުލުހުންގެ ބެލުމުގެ ދަށަށް ގެނެވިފައި ނުވާ ކަމަށާއި އަދި އެސަރަހައްދުގައި ބިސްޖަހައި އަލިފާން ރޯކުރިކަމަށް ބުނާ ރައީސް މައުމޫނުގެ ފޮޓޯ ވީތަނެއް ނޭގޭ ކަމަށެވެ
ރޭ ކަލާފާނު ސުކޫލުގައި ބޭއްވި އެމްޑީޕީގެ ޖަލްސާގައި އެޕާޓީން ވަނީ މިހާރު އޮތް ސަރުކާރާ ދެކޮޅަށް ނުކުތުމަށް ގޮވާލައި އަދި މިހާރު ސަރުކާރުގެ އިސްވެރިން އަޑީގައި ތިބެގެން އެމްޑީޕީގެ މެމްބަރުންނަށް ކުރަމުންދާ އަނިޔާތަކުގެ ބަދަލު ހިފުމަށް ވެސް ގޮވާލާފަ އެވެ
Report: Muhusin
Velidhoo News
Courtesy: Jazeera Daily
No comments:
Post a Comment