ދެ ޖިންސްގެ ކުދިންނަށް އެއް ފުރާޅެއްގެ ދަށުން ތައުލީމް ދިނުން
ދަރިވަރުންގެ އަޚްލާޤު ގޯސްވަމުންދާ ވާހަކައަކީ އަބަދުމެ އިވެމުންދާ ވާހަކައެކެވެ. އެހެންނަމަވެސް އެކަމުގެ ސަބަބުތައް ހޯދައިބަލައި އެކަންކަމަށް އިޞްލާޙީ ބަދަލެއް އަންނަ ތަނެއް ނުފެނެއެވެ. މިކަމުގައި އަބަދުވެސް ފެންނަނީ ”ކޭބަލްޓީވީ“, ”އިންޓަރނެޓް“ އަދި މިނޫންވެސް މިފަދަ ”އަމިއްލަ ދިފާޢުގައި ވާހަކަ ނުދެއްކޭ“ ”ފަކީރެއް“ ގެ ބޮލުގައި އިލްޒާމުތައް އަޅުވާތަނެވެ. އަދިވެސް ކަމާބެހޭ )ނުވަތަ ކަމާބެހޭ ކަމަށް އަޅުގަނޑު ޤަބޫލުކުރާ( ފަރާތްތަކުން ޚަބަރު ފަތުރާ ވަޞީލަތްތަކުގައި ވިދާޅުވާ ވަރަށް ”ހަރު“ ބަހެއް އޮވެއެވެ. އެއީ ”ވަކިމީހެއްގެ ބޮލުގައި މިކަމުގެ ޒިންމާ އެޅުވުމުގެ ބަދަލުގައި މިއީ މުޅި މުޖްތަމަޢުގެ ކަމެއްކަމަށް ޤަބޫލުކުރާށެވެ.“ މިއެވެ. އަޅުގަނޑަށް ވިސްނޭ ގޮތުގައި މިއީ, ކަނޑައެޅިގެން ކޮނޑުގައި އެޅިފައިވާ ޒިންމާ ނަގައި އެހެން ފަރާތެއްގެ ކޮނޑުގައި އެޅުވުމަށްވެސް ނުކެރޭ ހާލުގައި އެންމެންގެ މައްޗަށް ފަތުރާލާ ފަތުރާލުމެކެވެ. ދަރިވަރުންގެ އަޚްލާޤު ގޯސްވުމުގެ ފަހަތުގައި ތަޢުލީމީ ނިޒާމުގައި ހުރި ހާ އަޅާ ކަންތައްތަކެއް އެބަހުއްޓެވެ
ގްރޭޑް ހަޔަކުން ފެށިގެން ގްރޭޑް 10 އާ ހަމަޔަށް ދެޖިންސުގެ ކުދިންނަށް ވަކި ކްލާސްތަކެއްގައި ކިޔަވައިދިނުމަކީ މައްސަލަތަކުގެ ކުރި ފަޅަންފަށާ ހިސާބެވެ. ކުދިންގެ ޢުމުރުން ތޭރައަހަރާއި ސޯޅައަހަރާއި ދެމެދަކީ ނަފްސާނީ ގޮތުންނާއި ޖިސްމާނީ ގޮތުން ގިނަ ބަދަލުތަކެއް އަންނަ ދުވަސްވަރެކެވެ. އެހެންކަމުން މިދުވަސްވަރުގައި ދެޖިންސުގެ ކުދިން ވަކިކުރުމުގެ ސަބަބުން އަނެއްޖިންސުގެ ކުދިންނާމެދު ދެކޭގޮތް ބަދަލުވެއެވެ. އަނެއްޖިންސުގެ ކިޔަވާ ކުދިންނާމެދު އަޚުންނާއި އުޚުތުންގެ ގޮތުގައި ދެކުމުގެ ފުރުޞަތު ބަންދުވެ އެކުދިންނަށް ފާރަލައި ”ބޯކޮޅުބަލަމުން“ ދުވަންޖެހޭ ބަޔަކަށް ވެގެންދެއެވެ
މިޢުމުރުގެ ގިނަ ކުދިންނަކީ ހިފަހައްޓާ ކަންތައްތައް ކުރުމަށާއި އެކަންތައްތައް ހިފަހައްޓާ ސަބަބު ތަޖްރިބާ ކުރަން ބޭނުންވާ ބައެކެވެ. އެހެންކަމުން މިވަކިކުރާ ވަކިކުރުމުން އެކުދިންނަށް ލިބޭނެ މެސެޖު ވަރަށްވެސް ގޯހެވެ. އެންމެ ދަށުގްރޭޑް ތަކެކޭވެސް އެއްގޮތަށް އެއްކްލާސްތަކެއްގައި ދެޖިންސުގެ ކުދިންނަށް ކިޔަވައިދިނުމާއި އެކު ހަރުދަނާ އުޞޫލުތަކެއް ދަސްކޮށްދިނުން މާރަނގަޅެވެ. މިއުޞޫލުތަކަކީ ޅައިރުއްސުރެ ދަސްކޮށްދެއްވި ޢަމަލު ކުރެވެމުންދާ ހަރުދަނާ ރީތި އުޞޫލުތަކެއްނަމަ މިހާރު ދިމާވަމުންދާ މައްސަލަތައް ކުރިމަތިވުން ދުރެވެ
މަޖީދިއްޔާ ސްކޫލާއި ދަރުމަވަންތަ ސްކޫލްފަދަ ސްކޫލްތަކުގައި ދަރިވަރުންގެ ކިބައިން ފެންނަ ނުރަނގަޅު ޙަރަކާތްތަކަށް ބަލައިލުމުން މައްސަލަ އެއޮތީ ސާފުކޮށް ފެންނާށެވެ. އެއްޖިންސުގެ ކުދިން ގިނަ ދުވަސްތަކަކު ދިމާވެ ”އެކުލެވުމުން“ ނުރަނގަޅު ކަންތައްތައް ހިންގާ ”ގޭންގު“ ތައް އުފެދުމުގެ ފުރުޞަތު މާބޮޑެވެ. އަމީނިއްޔާ ސްކޫލްގެ ”ޟައީފް“ އަންހެންކުދިން ތަޅާފޮޅުމާއި މާރާމާރީ އާއި ދުންފަތާއި މަސްތުވާތަކެއްޗާ ދިމާލަށް ގެންދިއުމަށް މިހާރު މިއޮތް ނިޒާމު އެހީތެރިވެދެއެވެ
ޢާއްމުގޮތެއްގައި އަނެއް ޖިންސުގެ ކުދިން އެއްކުލާހެއްގައި ތިބޭނަމަ ދަރިވަރުންގެ ލަދުވެތިކަން ރަނގަޅު މިންގަނޑެއްގައި ހިފެހެއްޓެއެވެ. މަޖީދިއްޔާ, ދަރުމަވަންތައިގެ ގިނަ ކުދިން ސީއެޗްއެސް.އީ އަށް ދާ ހިސާބުން ހެޔޮ ބަދަލުތަކެއް އައިސް ”މައިތިރި“ ވާކަން ފާހަގަކުރެވެއެވެ. މިފަދަ މަސްހުނި ކުލާސްރޫމުތަކުގައި ހަޑިހުތުރު ބަސްތައް ބޭނުންކުރުން މަދުކަމަށް މުދައްރިސުންވެސް ފާހަގަކުރައްވައެވެ
ބައިނަލް އަޤްވާމީ އެތައް ސްކޫލެއްގައި މިހާރު ބޭނުން ކުރެވެމުންދަނީ ދެޖިންސުގެ ކުދިންނަށް އެއްފުރާޅެއްގެ ދަށުން ކިޔަވައި ދިނުމުގެ ނިޒާމެވެ. ކުލާސްތަކުގައި ދެޖިންސުގެ ކުދިން ހަމަހަމައަށް ބޭތިއްބުމުގެ ނިޒާމެވެ. އަޅުގަނޑުމެންގެ އަވަށްޓެރި ޤައުމުތަކަށް ބަލައިލިއަސް މިއުޞޫލުން ހިންގާ ދުނިޔޭގެ ފެންވަރުގެ ކާމިޔާބު މުއައްސަސާތައް ފެންނަން އެބަހުއްޓެވެ. ގްރޭޑް އެކަކުން ފެށިގެން ބާރައާއި ހަމައަށް ކިޔަވައިދޭ _”އެލިޒަބަތު މެއަރ ސްކޫލަކީ“ މުޅި އޭޝިޔާގައިވެސް ފާހަގަކުރެވިފައިވާ ބައިނަލް އަޤްވާމީ ސްކޫލެކެވެ. ކުދިންގެ އަޚްލާޤާއި ދެވޭ ތަޢުލީމުގެ ފެންވަރަށް ބަލައިލިއަސް ލާމަސީލު ސްކޫލެކެވެ. ޙަޤީގަތަކީ ހަރުދަނާ އުޞޫލުތަކާއި އެކު ހުރިހާ ގްރޭޑެއްގެ ހުރިހާ ކްލާހެއްގައި ވެސް ދެޖިންސުގެ ދަރިވަރުން ތިބޭކަމެވެ
ތެދެކެވެ. ސެންޓަރ ފޯރ ހަޔަރ ސެކަންޑަރީ އެޑިއުކޭޝަނުގެ ”ކޯތާފަތުގައި ޖެހިފައިވާ ލައްގަނޑުގެ ވާހަކަ ވަރަށް ގިނައިން ދެކެވެއެވެ. އެތަނުގައި ހިންގާފައިވާ ބަދުއަޚްލާޤީ ޢަމަލުތަކުގެ ވާހަކައެވެ. ތެދުތެދަށް ދަންނަވާނަމަ އެސެންޓަރުގެ ޤަވާޢިދުތަކާއި އުޞޫލުތައް ”ފަތިން ގޮސްފައިވާ“ މިންވަރާއި އަޅާބަލާއިރު އެތަނުގެ ހާލަތު ރަނގަޅެވެ. ހަމައެކަނި އަންހެން ކުދިންނަށް ކިޔަވައިދޭ އަމީނިއްޔާގައި ހިނގާ މިފަދަ ކަންތައްތައް މާގިނައެވެ. ދަންނަވަންތޯއެވެ. ސީއެޗްއެސްއީގެ ދަރިވަރުން ރޭގަނޑު ދިހައެއް އެގާރަ ޖަހަންދެން މަތީ ފަންގިފިލާތަކުގައި ”ކިޔަވަން ތިބޭއިރު, ސްކޫލް ދޮރާށި ދޮށުގައި ނިދިފައި އިން ގާޑަކު ނޫން މުއައްޒަފަކު ސްކޫލްގައި ނެތުމަކީ ހަމަ ސްކޫލްގެ މައްސަލައެކެވެ. ހިންގުންތެރިކަމުގެ މައްސަލައެކެވެ. ފަރުވާތެރިކަމާއި އިޚްލާޞްތެރި ކަމުގެ މައްސަލައެކެވެ
ކުރާނީ ކީއްތޯއެވެ. 2002 ވަނަ އަހަރު މިސްކޫލްގެ ޢިއްޒަތްތެރި ޕްރިންސިޕަލް ނޫހަކަށް ދެއްވި އިންޓަވިއު އެއްގައި ވިދާޅުވެފައިވަނީ ”ދަރިވަރުންނަށް ސްކޫލް ތެރޭގައި މިނިވަންކަން ދީފައިވާނީ ޒިންމާ އުފުލަންޖެހޭ ގޮތަށް“ ކަމަށެވެ. ހަރުދަނާ ޤަވާޢިދުތަކެއް އެކަށައަޅައި ތަންފީޒު ކުރުމުގެ ބަދަލުގައި ޢިއްޒަތްތެރި ޕްރިންސިޕަލްވެސް ޒިންމާ އުފުލަން މިޖެއްސެވީ އަށާރަ އަހަރު ނުފުރޭ ކުދިންތަކަކަށެވެ
އަޅުގަނޑުމެންގެ ތެރޭގައިވެސް ހަރުދަނާ މުއައްސަސާތައް އެބަހުއްޓެވެ. ކުއްލިޔަތުލް ދިރާސާތުލް އިސްލާމިއްޔާ އަކީވެސް ދެޖިންސުގެ ކުދިންނަށް އެއްކުލާސްތަކެއް ތިބެގެން ޢިލްމު އުނގެނެވޭ ގޮތަށް ހިންގާ ތަނެކެވެ. މައްސަލަތަކެއް ޖެހޭ ވާހަކައެއް ނާހަމެވެ. އެތަނުގެ ދަރިވަރުންގެ އުޅުންތަކާއި ގުޅުންތައް ހުންނަގޮތް ބައްލަވާށެވެ. ދިވެހިން ފަޚުރުވެރިވާފަދަ ހެދުމެއްގައި ޢިލްމު އުނގެނެމުން އެދަނީ ދިވެހިން ފަޚުރުވެރިވުން ޙައްޤު މިންވަރަކަށެވެ. ސްކޫލްތައް ހިންގުމުގެ ނިޒާމުގައި މިވަނީ މުރާޖަޢާ ކުރަންޖެހިފައެވެ. އަޅުގަނޑުމެންގެ ޤައުމުގައި ކޮނޑުއަޅައިގެން ތިއްބެވި ބޭފުޅުން ”ހަޔެއްޖަހަން ފަހަކަށް“ ވެ ވަރުބަލިވަމުންދާއިރު އަރަން އޮތް ޅަޖީލު ހަރުދަނާ ކުރެވޭތޯ އުޅެމާ ބަހީއެވެ. އެކުދިންނަކީ ތަހުޒީބުވެފައިވާ, ހަރުދަނާ ބަޔަކަށް ހެދޭތޯ އުޅެމާ ބަހީއެވެ, ޤަވާޢިދުތައް ހަރުދަނާކޮށް ދީނަށާއި ޢިލްމަށް އަހުލުވެރިކުރުވައި ބަދަލުކުރަންޖެހޭ ކަންތައްތައް އަވަހަށް ބަދަލުކުރަމާ ބަހީއެވެ. އޭގެ ތެރޭގައި ހުރިހާ ގްރޭޑެއްގައި ދެ ޖިންސުގެ ދަރިވަރުންނަށް އެއްކްލާސްތަކެއްގައި ކިޔަވައިދިނުން އަޅުގަނޑު ފާހަގަކުރަމެވެ
Velidhoo News
No comments:
Post a Comment