ޓީވީ އާއި ރޭޑިއޯއިން މަޖުލިސް ދުރަށްފޮނުވުން ހުއްޓާލުމާމެދު ވިސްނަމުންދާ ކަމަށް އިންފޮމޭޝަން މިނިސްޓަރ ވިދާޅުވެއްޖެ
ޓެލެވިޜަން މޯލްޑިވސް އާއި ދިވެހިރާއްޖޭގެ އަޑުން މިހާރު ދުރަށްފޮނުވަމުން އަންނަ ދެ މަޖުލީހުގެ ޖަލްސާތައް ފޮނުވުން ހުއްޓާލުމާމެދު ވިސްނަމުންދާ ކަމަށް އިންފޮމޭޝަން މިނިސްޓަރ މުހައްމަދު ނަޝީދު ވިދާޅުވެއްޖެ އެވެ
ނަޝީދުގެ އަމިއްލަ ފުޅު ސައިޓްގައި މިދިޔަ ހޮނިހިރު ދުވަހު ނަޝީދު ވިދާޅުވެފައިވަނީ މަޖުލީހުގެ ޖަލްސާތައް ދުރަށް ފޮނުވަން ފެއްޓުމުން މުޖުތަމައުއަށް ބޮޑެތި ފޫނުބެއްދޭނެހާ ނޭދެވޭ އަސަރުތަކެއް ކުރަމުންދާ ކަމަށާއި އެހެން ކަމުން މަޖުލީހުގެ ޖަލްސާތައް އިތުރަށް ދެއްކުމާމެދު ވަރަށް ބޮޑަށް ވިސްނަމުންދާ ކަމަށެވެ
” އަޅުގަނޑަށް އިވެމުންދާ ގޮތުގައި މީގެ ސަބަބުން ކުދިން މައިންބަފައިންގެ ބަހެއް ގަބޫލެއް ނުކުރޭ އަދި ދަރިވަރުން ޓީޗަރުންގެ ބަހެއް ގަބޫލެއް ނުކުރޭ“ ނަޝީދުގެ ސައިޓްގައި މަޖުލީސް ދެއްކުން ހުއްޓާލަންޖެހޭ ސަބަބެއް ކަމަށް އެމަނިކުފާނު ވިދާޅުވެފައިވެ އެވެ
ނަޝީދު ވިދާޅުވީ މަޖުލީހުގައި މަޖުލީސް މެމްބަރުން ދައްކަމުންދާ ބޭއަދަބީ ވާހަކަތައް ޓީވީއާއި ރޭޑިޔޯ މެދުވެރިކޮށް މިހާރު ގޭގޭގެ ސިޓިންގ ރޫމަށް ފޯރަމުންދާ ކަމަށާއި އޭގެ ސަބަބުން އެއްވެސް މައްސަލައެއް ކުރިމަތިވެއްޖެ ނަމަ ބްރޯޑްކާސްޓް ކުރާ ފަރާތްގޮވައިގެން ދައުވާ ކުރެވޭނެ ކަމަށެވެ
” އަޅުގަނޑަށް މިހާރުދަނީ ވަރަށް ބޮޑަށް ޕްރެޝަރ ކުރަމުން މިކަހަލަ ދަށްފެންވަރުގެ އަމަލުތައް ބްރޯޑްކާސްޓް ނުކުރުމަށާއި އެކަން ފެޝަނަކަށް ހަދަނީ އަޅުގަނޑުކަމަށް ބުނެ“ ނަޝީދު ވިދާޅުވި އެވެ
ނަޝީދު ވިދާޅުވީ އިންފޮމޭޝަން މިނިސްޓަރަކަށް ހުރެ އެފަދަ އަމަލުތަކެއް ދުރަށްދައްކާ މައްސަލާގެ ޒިންމާ އެމަނިކުފާނު އުފުލަން ޖެހޭނެ ކަމަށާއި އެގޮތުން މިހާރު ރާއްޖޭގައި އާންމު ވަމުންދާ ބައްޔެއް ކަމަށްވާ ދުވަސްވީ މީހުންނަށް އިހްތިރާމް ނުކުރުމާއި އިސްފަރާތްތަކަށް އިހްތިރާމް ނުކުރާ މައްސަލައަކީވެސް ވަރަށް ބޮޑުވަމުން އަންނަ މައްސަލައެއް ކަމަށް ފާހަގަކޮށް އެކަމަކީ މަޖުލީސް ދެއްކުމުން މުޖުތަމައުއަށް އަންނަމުންދާ ބަދަލެއް ކަމަށް ނަޝީދު ވިދާޅުވެފައިވެ އެވެ
Velidhoo News
No comments:
Post a Comment