މަސްތުވާ ތަކެތީގެ މައްސަލަތައް ކޮންޓްރޯލުކުރުމަށް ސަރުކާރުން އެއްވެސް އެއްބާރުލުމެއް ނުދޭ: އެސްޑަބްލިޔޫއޭޑީ
މަސްތުވާތަކެތީގެ މައްސަލަ ހައްލުކޮށް އެކަން ކޮންޓްރޯލް ކުރުމަށް ކުރާ އެއްވެސް މަސައްކަތަކަށް ދިވެހި ސަރުކާރުން އެއްބާރުލުމެއް ނުދޭ ކަމަށް މަސްތުވާ ތަކެއްޗާ ދެކޮޅަށް މަސައްކަތް ކުރާ އަންހެނުންގެ ޖަމްޢިއްޔާ (ސޮސައިޓީ ފޮރ ވިމެން އެގެއިންސްޓް ޑްރަގް) އިން ބުނެފިއެވެ
ޖަޒީރާ ނޫހަށް ބުރާސްފަތި ދުވަހު މައުލޫމާތު ދެއްވަމުން އެޖަމްއިއްޔާގެ މީޑިޔާގެ ކަންތައްތަކުގައި އިސްކޮށް އުޅުއްވާ އުމައިމާ އާދަމް ވިދާޅުވީ މިމައްސަލަ ހައްލު ކުރުމަށްޓަކައި ކުރެވެން ހުރި މަސައްކަތްތަކާ ބެހޭގޮތުން ސަރުކާރުގެ ކަމާބެހޭ އިދާރާތަކައެކު ބައްދަލުވުންތައް ބައްވާފައިވާ ކަމަށާއި އެއިން އެއްވެސް ބައްދަލުވުމަކުން އެދެވޭ ކާމިޔާބެއް ލިބިފައި ނުވާ ކަމަށެވެ. އޭގެ ތެރޭގައި މޯލްޑިވްސް ކަސްޓަމްސް ސަރވިސް, އެޓާރނީ ޖެނެރަލްގެ އޮފީސް އަދި މޯލްޑިވްސް ޕޮލިސް ސަރވިސްގެ ޑްރަގް އިންފޯސްމަންޓް ޔުނިޓް ފަދަ އިދާރާތައް ހިމެނޭ ކަމުގައި އުމައިމާ ވިދާޅުވިއެވެ.
"ފުލުހުން ވިދާޅުވަނީ ހައްލު ކުރަން ދަތީ ޤާނޫން ހެދިފައި ނެތުމުން ކަމަށް. އަދި އިޚްތިޔާރާއި ބާރު ލިބިފައި ނެތީކަމަށް" އުމައިމާ ވިދާޅުވިއެވެ
އެޖަމްއިއްޔާއިން ބުނީ ސަރުކާރުގެ އިދާރާތަކާއި ބައްދަލުކުރުމުގެ ދެވަނަ ބުރު މިހާރު ފަށާފައިވާ ކަމަށާއި މިބުރުގައި އެއިދާރާތަކުން ބައްދަލު ކުރުމަށް ލިބޭ ތަރުހީބުވެސް ވަރަށް ކުޑަ ކަމަށެވެ
މީގެ އިތުރުން ރާއްޖޭގެ ރައީސުލް ޖުމްހޫރިއްޔާއާ ބައްދަލުކުރުމަށް މިހާތަނަށް ކޮށްފައިވާ މަސައްކަތް ކާމިޔާބު ވެފައި ނުވާ ކަމަށާއި ދެފަހަރަކަށް އެޕޮއިންޓްމަންޓް ދެއްވާފައިވެސް ކެންސަލް ކުރައްވާފައިވާކަމަށް އުމައިމާ ވިދާޅުވިއެވެ
” ފުރަތަމަ ފުރުސަތު ދެއްވީ މިއަހަރުގެ 21 ޖުލައި ގައި. އެފަހަރު ބައްދަލުކުރަންދާ ނިކުމެ ނިކުމެ އޮއްވާ ގުޅާފައި އެޕޮއިންޓްމަންޓް ކެންސަލް ކުރީ. އޭގެ ފަހުން އޯގަސްޓް 15 ގައި ހުށަހަޅައިގެން 22 ގައި އެޕޮއިންޓްމަންޓް ދެއްވާނެ ކަމަށް ވިދާޅުވި. އެކަމަކު އެއެޕޮއިންޓްމަންޓްވެސް ކެންސަލް ކުރެއްވި. އޭގެފަހުން އަދިވެސް ނުލިބޭ“ އުމައިމާ ވިދަޅުވިއެވެ
އުމައިމާ ވިދާޅުވީ މަސްތުވާތަކެތީގެ ވިޔަފާރި ކުރަނިކޮށް އެތަކެއްޗާއެކު އަތުލައިގެންފައިވާ މީހުން މާލެ ތެރޭގައި އުޅެމުން ދާތީ އެންގުމުންވެސް އެކަމަށް އެދެވޭ ހައްލެއް ގެނެސްފައި ނުވާ ކަމަށާއި, މަސްތުވާތަކެތީގެ ހުކުމުގައި 25 އަހަރަށް ޖަލަށް ލާފައިވާ މީހުން އާއިލާއާ ބައްދަލު ކުރުމަށް 16 ދުވަހަށް ގެނެސްފައި އެމުއްދަތު ފަހަނަޅާ އެތައް ދުވަހެއް އިތުރުވެގެން ދިއުމުން އެކަން އެންގުމުންވެސް އެދެވޭ ފިޔަވަޅު ނާޅާ އެބަހުރިކަމަށެވެ
"އަޅުގަނޑުމެން ބަލަމުން ގެންދަން ވަރަށް ރަނގަޅަށް. މަސްތުވާތަކެތި ބޭނުން ކުރާ މީހުންނާއި އެތަކެތީގެ ވިޔަފާރި ކުރާ މީހުންގެ ކަންތައްތައް. އަދި އެފަދަ ކަންކަމުގައި ހުކުމްކޮށްފައިވާ މީހުން ގޭގައި ތިބޭނަމަ އެތިބީ ކިހިނެތްތޯ. އާއިލީ ބައްދަލުވުމަށްތޯ ނޫނީ ދޫކޮށްލާފަތޯ. ބަލާފައި އެފަދަ ފަރާތްތަކުގެ ރިޕޯޓް ކަމާބެހޭ ފަރާތްތަކަށް އަންގަން. މާބޮޑު އަޅާލުމެއް ނުލިބޭ" އުމައިމާ ވިދާޅުވިއެވެ
އެޖަމްއިއްޔާއިން ބުރާސްފަތި ވަނީ 832 މީހުން ސޮއިކޮށް ރައީސުލް ޖުމްހޫރިއްޔާގެ އޮފީހަށް ޕެޓިޝަނެއް ދުވަހު ހުށަހަޅާފައެވެ. މިއީ ކުރިން މަސްތުވާތަކެތި ބޭނުންކޮށް މިހާރު ރަނގަޅުވެފައިވާ މީހުންނާއި މަސްތުވާތަކެތީގެ ވަބާގައި ޖެހިފައިވާ މީހުންގެ ދަރިންނައި އަނބިން އަދި އެފަދަ އާއިލާތަކުގެ މީހުން ސޮއިކޮށް ހުށަހަޅާފައިވާ ޕެޓިޝަނެކެވެ. މިޕެޓިޝަނަކީ މަސްތުވާތަކެތި ހައްލުކޮށް ދިނުމަށް އެދި ރައީސުލް ޖުމްހޫރިއްޔާއަށް ހުށަހަޅާފައިވާ ޕެޓިޝަނެކެވެ
އުމައިމާ ވިދާޅުވީ ޕެޓިޝަންގެ ޖަވާބަކަށް އިންތިޒާރު ކުރާނީ 10 ދުވަހަށް ކަމަށާއި އޭގެފަހުން އަނެއްކާވެސް ޕެޓިޝަންތައް ހުށަހަޅާނެ ކަމަށެވެ
މަސްތުވާތަކެއްޗާ ދެކޮޅަށް މަސައްކަތް ކުރާ އަންހެނުންގެ ޖަމްއިއްޔާއަކީ މިދިޔައަހަރުގެ ނޮވެމްބަރ 26 ގައި އުފައްދާފައިވާ މިހާތަނަށް 700 މެންބަރުން ހަރަކާތްތެރިވާ ޖަމްއިއްޔާ އެކެވެ
VELIDHOO NEWS
velidhoocommunity@gmail.com
No comments:
Post a Comment