ނިޒާމީ ވޯޓުން މޮޅުވީ ކޮން ޕާޓީއެއް؟
އާންމުކޮށް ދުނިޔޭގެ ޕާޓީ ސިސްޓަމަށް ހިންގާ ގައުމުތަކުގައި ޕާޓީއެއް ބަލިވެއްޖެކަން ނޫނީ ފެއިލްވެއްޖެކަން އަންގައިދޭ ތިލަފަތަކީ އާންމު އިންތިޚާބެވެ. އެހެންނަމަވެސް ރާއްޖޭގައި ޕާޓީތައް ބައިވެރިވެގެން މިހާތަނަށް އާންމު އިންތިހާބެއް ބާއްވާފައެއް ނުވެއެވެ. އެހެންކަމުން ވަކި ޕާޓީއެއް އެވަނީ ފެއިލްވެފައިކަމަށް ބުނެ އެޕާޓީއަކާއި ދިމާލަށް އިނގިލި ދިއްކުރެވިދާނެ ތޯއެވެ؟
ޕާޓީތައް އުފެދުނު ފަހުން މި ވީހާތަނަށް ރާއްޖޭގައި ބާއްވާފައިވަނީ އެއްވެސް ޕާޓީއަކުން ބައިވެރިނުވާ އާންމު އިންތިހާބެކެވެ. އެއީ މުސްތަގުބަލުގައި ރާއްޖޭގައި ވެރިކަން ކުރާނީ ކޮންނިޒާމެއްގެ ދަށުންތޯ ބެލުމަށް ނެގުނު ފެންނަ ނުފެންނަ ވޯޓެކެވެ
ދުނިޔޭގެ އެހެން ގައުމުތަކަށް ބަލާއިރު ޕާޓީއެއް ފެއިލްވެއްޖެ ކަމަށް ބުނެވޭނީ އެޕާޓީއަކަށް އާންމު އިންތިހާބެއްގައި ލިބޭ ވޯޓެއްގެ މައްޗަށް ބިނާ ކޮށެވެ. މިދިޔަ ހަފްތާގައި ނެގި ފެންނަ ނުފެންނަ އާންމު ވޯޓުން އެމްޑީޕީން ތާއީދު ކުރި ބަރުލަމާނީ ނިޒާމްވަނީ ބަލިވެފަ އެވެ. އެހެންކަމުން އެހެން ޕާޓީތަކުން ބުނަމުންދަނީ އެމްޑީޕީއެވަނީ ފޭލްވެފައި ކަމަށެވެ. މިއީ ކިހާވަރެއްގެ ހަގީގަތެއްތޯ މިއީ މިހާރު އުފެދޭ ސުވާލެކެވެ. އެކަމަކު އަސްލުވެސް އެމްޑީޕީ ބަލިވީބާއެވެ؟
އެމްޑީޕީން މިއިންތިހާބަށް ނުކުމެފައިވަނީ ސަރުކާރުގެ ނުފޫޒުތަކާއި ބާރުތަކާއި އަދި ރާއްޖޭގައި މިހާރު އުފެދިފައިވާ އެހެން ހުރިހާ ސިޔާސީ ޕާޓީތަކާއި ދެކޮޅަށެވެ. މިމެޗްގައި ހުރިހާ ޕާޓީތަކާއި އަދި ސަރުކާރާއި ދެކޮޅަށް ކުޅެގެން އެމްޑީޕީއަށް ލިބިފައިވަނީ 58504 ވޯޓެވެ. އެހެން ހުރިހާ ޕާޓީތަކެއް އެއްވެގެން ލިބިފައިވަނީ 95619 ވޯޓެވެ. އެވޯޓްތައް ރިޔާސީ ނިޒާމަށް ތާއީދުކޮށް ކެމްޕޭން ކުރަމުންދިޔަ 4 ޕާޓީގެ މެދުގައި ހަމައަށް ބަހައިފިނަމަ ޕާޓީއަކަށް ލިބެނީ 23904.75 ވޯޓެވެ. އެހެންކަމުން ވަކި ޕާޓީއެއްގެ ހައިސިއްޔަތުން އެމްޑީޕީ މިއިންތިހާބު ކާމިޔާބުކޮށްފައިވާކަމަށް ގަބޫލުކުރަން ޖެހެއެވެ. މި ވޯޓް ނިމި ފުރިހަމަ ނަތީޖާ އިއުލާން ނުކުރެވެނީސް ޑީއާރްޕީގެ ޒައީމް މައުމޫން އަބުދުލްގައްޔޫމް ނޫސްވެރިންނާ ބައްދަލުކޮށް ބުނެފައިވަނީ މި ވޯޓްގެ ނަތީޖާއިން ސާބިތުވެގެން ދިޔައީ އަދިވެސް ރައްޔިތުން މައުމޫނަށް ތާއީދުކުރާ ކަމަށެވެ. އަދި މިނަތީޖާ ނެރެވިފައިވަނީ އެޕާޓީން ކުރި ކެމްޕޭނުން ކަމަށެވެ. ކޮންމެ މީހަކުވެސް ގަބޫލުކުރަން ޖެހޭ އެއްކަމަކީ މި ނަތީޖާ ކޮންމެ ގޮތަކަށް ނުކުތް ނަމަވެސް ރިޔާސީ ނިޒާމަށް ތާއީދުކޮށް ކެމްޕޭން ކުރުމުގައި އެންމެ ބޮޑު ހަރަދެއް ކޮށްފައިވަނީ ދިވެހި ރައްޔިތުންގެ ޕާޓީ (ޑީއާރޕީ) ން ކަމަށެވެ. އެހެންކަމުން މިލްކުވެރިކަން ސާބިތުކުރުމުގައި ޑީއާރޕީއަށް ލިބޭބައި ބޮޑުވުމަކީވެސް އެކަށީގެންވާ ކަމެކެވެ
އެގޮތުން ރިޔާސީ ނިޒާމަށް ލިބުނު ވޯޓު ދެބައަށް ބަހާފައި ޑީއާރޕީއަށް އެއްބައިދީފިނަމަ ވާނީ 47809 ވޯޓެވެ. އެއީ އެމްޑީޕީއިން އެކަނި ވާދަކޮށް ބަރުލަމާނީ ނިޒާމަށް ހޯދާފައިވާ 58504 ވޯޓަށް ވުރެ 10695 ވޯޓް މަދު އަދަދެކެވެ. އެހެންކަމުން އެމްޑީޕީއާ ހަމައަށް އައުމަށް ޑީއާރޕީއަށް އަދިވެސް 10367 ވޯޓް ލިބެންޖެހޭކަން ފާހަގަކޮށްލަން ޖެހެއެވެ. އެހެން ކަމުން ވަކި ޕާޓީއެއްގެ ގޮތުން ކުރީގައި އުޅެނީ އެމްޑީޕީއޭ ބުނުމުގެ ފުރުސަތު ބޮޑެވެ. ދެން ބަލާއިރު މިއިންތިހާބުގައި ރިޔާސީ ނިޒާމަށް ތާއީދުކުރި އަނެއް ތިން ޕާޓީގެ މެދުގައި ބާކީވާ ބައި ބަހަފިނަމަ ޕާޓީއަކަށް ލިބޭނީ 15597 ވޯޓެވެ. މިގޮތަށް ވޯޓްތައް ބަހާލި ނަމަވެސް އެންމެ ގިނަ ވޯޓް ކާމިޔާބުކޮށްގެން އެއްވަނަ ހޯދާފައިވަނީ އެމްޑީޕީން ކަމަށް ބުނެވިދާނެ އެވެ. އެކަމަކު މިއިންތިހާބަކީ ސިޔާސީ ޕާޓީތައް ސީދާ ވާދަކޮށްގެން ބޭއްވި އިންތިހާބަކަށް ނުވުމުން މީގެ އެއްވެސް ކޮޅަކަށް ވާހަކަ ދެއްކުމުގެ ފުރުސަތެއް ނޯންނާނެ އެވެ. އެހެން ނަމަވެސް ބައެއް ޕާޓީތަކުން ވަނީ އެޕާޓީތައް މިއިންތިހާބު ކާމިޔާބު ކޮށްފި ކަމަށް ބުނެ އަޑު އުފުލާފަ އެވެ
މިއިންތިޚާބަކީ ރައްޔިތުންގެ ޚާއްސަ މަޖުލީހުގެ ބޭނުމަކަށް ބާއްވާފައިވާ އިންތިޚާބެކެވެ. އަދި މިވޯޓް ބޭއްވުމުގެ ކުރިން މަޖުލީހުގައި ބަހުސްކޮށްފައިވަނީ މިއިންތިޚާބަކީ ޕާޓީތަކުގެ ނުފޫޒުން އެއްކިބާވެ ނެނގެން ޖެހޭ ވޯޓެއް ކަމަށެވެ. އެހެންނަމަވެސް އާޚިރު ނަތީޖާ ލިބިފައި ވަނީ ޕާޓީތަކުން ވާދަކޮށް ޕާޓީތަކުން މިއިންތިހާބު ކާމިޔާބު ކުރުމެވެ
ދުނިޔޭގެ އެހެންތަންތަންގާއި ޕާޓީއެއް ފެއިލްވެއްޖެ ކަމަށް ބައެއް ފަހަރު ދެކެނީ އެޕާޓީއެއްގައި ހިމެނޭ ގަދަ ފަހުލަވާނުންތައް ޕާޓީން ވަކިވެގެން ދިއުމެވެ. މިގޮތުން ރާއްޖޭގައި އޮތް އެންމެ ބޮޑު ދެޕާޓީންވެސް ވަނީ މިމަންޒަރު ފެނިފަ އެވެ. އެގޮތުން އެމްޑީޕީގެ ބޮޑުންގެ ތެރެއިން އިބުރާހިމް އިސްމާއިލް (އިބުރާ) އާއި މުހައްމަދު ޝަރީފު (މަވޯޓާ) ވަނީ ވަކިވެ ދެ ޕާޓީއަކާއި ގުޅިވަޑައިގެންފަ އެވެ. ޑީއާރޕީން އެންމެ ފުރަތަމަ އިސްތިއުފާ ދެއްވީ ސަރުކާރުގެ މަތީފެންވަރުގެ ވަފުދެއް އޮތް ގޮތަށެވެ. އެއީ ހަޔަރ އެޑިއުކޭޝަން މިނިސްޓަރ އަދި ޑީއާރޕީގެ ޒައީމްގެ ކޮއްކޯފުޅު އަބުދުﷲ ޔާމީނާއި އެތަނުގެ ސްޓޭޓް މިނިސްޓަރ އަހުމަދު ނާޒިމާއި މިފްކޯގެ ޗެއަރމަން އަބުދުﷲ ޖާބިރެވެ. މިބޭފުޅުންނާ އެކު ޑީއާރޕީއަށް ނިސްބަތްވާ އެތައް ބޭފުޅުންނެއް ޕާޓީން ވަކިވި އެވެ. އެގޮތުން ޑީއާރޕީއަށް މަޖުލީހުގެ ދިހަ ގޮޑިއެއް ގެއްލި ވޭތުވެދިޔަ ތަނުގައި ޑީއާރޕީން މަޖުލީހުގައި ބޭނުންކުރަމުންދިޔަ އަޣުލަބިއްޔަތުގެ ބާރު ކެނޑިގެން ދިޔައެވެ. ހަމަ އެފަދައިން ޑީއާރުޕީގެ ނައިބު ޒައީމް އަދި ކުރީގެ އެޓާނީ ޖެނެރަލް ވަނީ ސަރުކާރުން އިސްތިއުފާދެއްވާ އަދި ޕާޓީންެވެސް ވަކިވެވަޑައިގެންފަ އެވެ. މިގޮތަށް ބަލާލި ނަމަވެސް ޑީީއާރޕީ އެމްޑީޕީއަށްވުރެ ބަލި ކަށިކަމަށް ބުނެވިދާނެ އެވެ
ދުނިޔޭގެ މަޝްހޫރު ގައުމުތަކުގައި ސަރުކާރެއް ފެއިލްވުމަށް ބެލެވެނީ ސަރުކާރުގެ އިސްމަގާމުތަކުގައި ތިއްބަވާ އިސްވެރިންތަކެއް އިސްތިއުފާދީފައި ދިއުމެވެ. ނުވަތަ އިސްތިއުފާދިނުމަށް މަޖުބޫރު ކޮށް އެސަރުކާރެއް ފެއިލްކޮށްލުމުންނެވެ. މިކަން މިދިޔަ އާދިއްތަ ދުވަހު ވަނީ ހާމަވެފައެވެ. އެއީ ޑރ.އަހުމަދު ޝަހީދު އިސްތިއުފާދެއްވުމަށް ފަހު ވިދާޅުވީ އެމަނިކުފާނު އިސްތިއުފާދީފައިވަނީ ޕޮލިޓިޝަނުން ކުރިކަމަކުން މަޖުބޫރުވެގެން ކަމަށެވެ. އެހެންކަމުން މިހާރު އެހިންގަމުންދާ ސަރުކާރު އެވަނީ ފެއިލްވެފައިކަމަށް ބުނެވިދާނެ އެވެ
މީގެ އިތުރަށް ސަރުކާރަކުން ރައްޔިތުންނަށް ފުއްދާދޭން ބުނާ ވައުދުތައް ނުފުއްދުމަކީވެސް އެސަރުކާރެއް ފެއިލްވެފައިވާ ކަމުގެ ހެއްކެކެވެ. މިކަން ދިވެހި ސަރުކާރުގެ ފަރާތުން ވަނީ ފެނިފައެވެ. އެއީ ކޮންމެ ރިޔާސީ އިންތިހާބެއްގައި ރައްޔިތުންގެ ރުހުން ހޯދުމުގެ ގޮތުން ކޮށްދޭން ބުނާ އެތައްކަމެއް ކޮށްނުދެވި ވާކަން ގަބޫލުކުރެވެ އެވެ
ސުވާލަކީ ފެއިލް ވެފައިވަނީ ކޮންޕާޓީ އެއްތޯއެވެ. އެމްޑީޕީތޯ އެވެ. ޑީއާރްޕީ ތޯއެވެ
Report: Soodh
velidhoocommunity@gmail.com
No comments:
Post a Comment