N. Velidhoo Community

ޕާޓީގެ 24 ވަނަ ޢާންމު ބައްދަލުވުން ކަލާފާނު ސްކޫލުގައި ބޭއްވިއްޖެ 17 އޯގަސްޓް 2007
ރޭ 9:00 ގައި ކަލާފާނު ސްކޫލުގައި ބޭއްވުނު ޕާޓީގެ 24 ވަނަ ޢާންމު ބައްދަލުވުން އަމާޒުކުރެވިފައިވަނީ މާދަމާ 18 އޯގަސްޓް 2007 ގައި ނެގުމަށް ހަމަޖެހިފައިވާ ރައްޔިތުންގެ ޢާންމު ވޯޓުގެ ކުރިއަށް ޕާޓީން ބާއްވާ އެންމެ މުހިންމު އެއްބައްދަލުވުމުގެ ގޮތުގައެވެ. ޕާޓީގެ ޒަޢީމް ޕާޓީގެ އެކްޓިވިސްޓުންނާއި ބައްދަލުކޮށްލެއްވުމަށް ޚާއްޞަ ކުރެވިގެން ބޭއްވުނު މި މުހިންމު ބައްދަލުވުން ހިނގާދިޔައީ އެހެން ޢާންމު ބައްދަލުވުންތަކާއި މުޅިން ތަފާތުކޮށެވެ. މިބައްދަލުވުމުގައި ހަމައެކަނި މެންބަރުންނާއި މުޙާތަބްކޮށްދެއްވާ ޕާޓީގެ ޒަޢީމް ވަނީ މާދަމާގެ ވޯޓު ކާމިޔާބުކުރެއްވުމަށް ހިތްވަރު ދެއްވާފައެވެ. އަދި މާދަމާގެ ވޯޓުގައި ޕާޓީން ތާއީދު ކުރާ ރިޔާސީ ނިޒާމް ބޮޑުތަފާތަކުން ކާމިޔާބު ކުރެއްވޭނޭކަމަށް އެމަނިކުފާނު ދެކެވަޑައިގަންނަވާކަމަށް ވިދާޅުވިއެވެ.

ކަލާފާނުސްކޫލުގެ ގޯތިތެރޭގައާއި އަދި ހޯލުގައި ބޭއްވުނު މި ބައްދަލުވުމަށް ވަރަށްގިނަ ޢަދަދެއްގެ މެންބަރުން ހާޒިރުވެލެއްވިއެވެ. . އަދި މެންބަރުން ޖޯޝާއި ފޯރީގައި މާދަމާގެ ވޯޓަށް ތައްޔާރުވެފައިވާ މިންވަރު މި ބައްދަލުވުމުން ފެނިގެން ގޮސްފައިވެއެވެ. މ ިބައްދަލުވުން ތަޢާރުފުކޮށްދެއްވީ ޕާޓީގެ ހީވާގި ސެކްރެޓެރީ ޖެނެރަލް އަލްފާޟިލް އަބްދުއްﷲ ޙަމީދުއެވެ. ބައްދަލުވުމުގެ ވަގުތުގައި ޓެލެވިޒަން މޯލްޑިވްސްއިން ދުރަށް ދައްކަމުން ދިޔަ ( 16 ވަނަ ދުވަހުގެ ރޭ ގެ ނިޒާމުގެ އެއަރޓައިމް) ޑީއާރުޕީގެ އެއަރޓައިމް މެންބަރުންނަށް ވަގުތުން ފެންނާނޭގޮތަށް ހަރުކުރެވިފައިވާ ސްކްރީނެއް މެދުވެރިކޮށް މެންބަރުންގެންދެވީ ބައްލަވަމުންނެވެ. އަދި އެއަށްފަހު ޓެލެވިޒަން މޯލްޑިވްސްއާއި ދިވެހިރާއްޖޭގެ އަޑުމެދުވެރިވެގެން ދުރަށް ފޮނުވުނު ނިޒާމީ ބޮޑު ބަހުސްގައި ޑީއާރުޕީން ވަޑައިގެންނެވި އުސްތާޛު މުޙައްމަދު ނަޝީދުއާއި އަދި ހުސައިން މުޙައްމަދު ބަރުލަމާނީ ދެ ކެންޕޭނަރުން ކަމުގައި ވާ އެމް.ޑީ.ޕީގެ ދެ މަހުޖަނުން އޭޑީކޭ ނާޝިދުއާއި އަހްމަދު ހަމްޒާއަށް ފުރިހަމަ ރައްދެއްދެމުން ގެންދެވި މަންޒަރުތައްވެސް މެންބަރުން ވަނީ ވަގުތުން ރިލޭކުރެވެމުން ދިޔަ ސްކްރީނުން ބައްލަވާލައްވާފައެވެ.
ޕާޓީގެ ޒަޢީމްގެ ކުރު އެހެނަސް ޢިބްރަތާއި އުންމީދުން ފުރިގެންވީ ވާހަކަފުޅުގައި އެމަނިކުފާނު ރިޔާސީ ނިޒާމަކަށް ތާއީދު ކުރައްވަނީ ދިވެހި ޤައުމަށްޓަކައި ކަމުގައި ވިދާޅުވިއެވެ. އަދި މާދަމާގެ ވޯޓް ﷲގެ ހެޔޮ ރަޙްމަތުން އެކަށީގެންވާ ބޮޑުތަފާތަކުން ރިޔާސީ ނިޒާމްއަށް ކާމިޔާބީ ލިބިގެންދާނޭކަމަށް އެމަނިކުފާނަށް ޔަޤީންވެވަޑައިގަންނަވާކަމަށް ވިދާޅުވިއެވެ. އަދި 16 އޯގަސްޓް ދުވަހުގެ މެންދުރުފަހުން ފެށިގެން ރާއްޖޭގެ ޚާރިޖީ ވަޒީރު ޑރ. އަޙްމަދު ޝަހީދު ސަރުކާރުން އިސްތިޢުފާ ދެއްވައިފިކަމަށް އިދިކޮޅުފަރާތްތަކުން ފަތުރަމުން ދިޔަ ވަރަށް ބޮޑު ދޮގު ޚަބަރަކާއި ގުޅިގެން މެންބަރުންނަށް ހަޤީޤަތް އޮޅުން ފިލުއްވައިދެއްވުމަށްޓަކައި އެވަގުތު ބައްދަލުވުމަށް ވަޑައިގެން އިންނެވި ރާއްޖޭގެ ޚާރިޖީ ވަޒީރު ޑރ. އަޙްމަދު ޝަހީދު މެދުވެރިކުރައްވާ އެ ޚަބަރު މެންބަރުންނަށް ސާފުކޮށްދެއްވިއެވެ.

ޕާޓީގެ ޒަޢީމް މެންބަރުންނާއި މުޙާތަބްކުރައްވަން ހުންނަވާ ޒަޢީމްގެ އެދިލެއްވުމަކަށް އެމަނިކުފާނުގެ އަރިއަހަށް ޑރ. ޝަހީދު ވަޑައިގެން މެންބަރުންނާއި މުޚާތަބްކޮށްދެއްވާ ވަރަށް ސާފުކޮށް އެމަނިކުފާނާއި ބޭހޭ ގޮތުން ބަޔަކު ފަތުރާފައިވަނީ ދޮގު ޚަބަރެއްކަން މެންބަރުންނަށް ސާފުކޮށްދެއްވިއެވެ. އަދި ޚުދު ޑރ. ޝަހީދުގެ އަމިއްލަ ޢިބާރާތުން އެމަނިކުފާނު ހުންނެވީ ރައީސް މައުމޫނަށްޓަކާ އަދި އެމަނިކުފާނުގެ އިސްލާޚީ އެޖެންޑާ ކުރިއަށް ގެންދެވުމަށްޓަކާ ކޮންމެފަދަ ޤުރުބާނީއެއްވުމަށްވެސް ތައްޔާރަށް ކަމަށް ވިދާޅުވިއެވެ.

ޒަޢީމްގެ ވާހަކަފުޅު ނިންމަވާލެއްވީ 18 އޯގަސްޓްގެ ވޯޓު ދެއްވުމަށް އެންމެހާ މެންބަރުންނާއި ދިވެހި އެންމެހާރައްޔިތުންގެ ތެރެއިން 18 އަހަރުން މަތީގެ އެންމެން ނުކުމެ ވިސްނެވުމަށްފަހު ރާއްޖޭއަށް އެންމެ ކަމުދާނޭ ނިޒާމަކަށް ވޯޓުދެއްވުމަށް އެދިވަޑައިގަންނަވާފައެވެ. އަދި ދިވެހި ރައްޔިތުންގެ ޕާޓީ ޚިޔާރު ކޮށްފައިވަނީ ދިވެހިންނަށް އެންމެ ކަމުދާނޭ ނިޒާމް ކަމުގައިވާ ރިޔާސީ ނިޒާމްކަން އެމަނިކުފާނު ހާމަކޮށްދެއްވިއެވެ.
ރޭގެ ބައްދަލުވުން ނިންމަވާލެއްވީ މެންބަރުންނަށް ތައްޔާރުކުރެވިފައިވާ ބިލެތްމީރުކޮށްލެއްވުމަކަށް ފަހު 11:15 ގައެވެ


Report: Velidhoo Community