ނިޒާމް ކަނޑައެޅުމަށް ނަގާވޯޓް: މިއަދު 6 ޖެހިއިރު ދެނިޒާމަށް ކެމްޕޭނު ކުރުމުގެ މުއްދަތު ހަމަވެއްޖެ
ރާއްޖޭގައި އޮންނަން ފެންނަ ވެރިކަމުގެ ނިޒާމް ކަނޑައެޅުމަށް ނެގޭ ވޯޓްގައި ދެނިޒާމަށް ކެމްޕޭނު ކުރުމަށް ދެވިފައި މުއްދަތު މިއަދު އިރުއޮއްސި 6 ޖެހި އިރު ހަމަ ވެއްޖެ އެވެ
މިއަދު މުއްދަތު ހަމަވިއިރު ބަރުލަމާނީ ނިޒާމާއި ރިޔާސީ ނިޒާމަށް ތާއީދު ކުރާފަރާތްތަކުން ވަރަށް ފޯރިއާ އެކު ކެމްޕޭނު ކުރަމުން ވަނީ ގެންގޮސްފަ އެވެ. މި އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ) އެމްޑީޕީ( ފިޔަވާ އެހެން ހުރިހާ ޕާޓީއަކުން ތާއީދުކޮށްފައި ވަނީ ރިޔާސީ ނިޒާމަށެވެ
މިއަދު 6 ޖެހުމާ ހަމައަށް އެމްޑީޕީއާއި ޑީއާރްޕީންވެސް ކެމްޕޭނު ކުރަމުން ގޮސްފައި ވެއެވެ. ނަމަވެސް އާދާލަތާއި, އައިޑީޕީ އާއި އެމްއެސްޑީޕީން މާފޯރިއާއެކު ކެމްޕޭނުކުރަމުން ގޮސްފައިވާތަނެއް ނުފެނެއެވެ
މިއަދު ހަވީރު ހެދިގޮނޑުދޮށުގައި އެމްޑީޕީގެ ޚާއްޞަ އެއްވުމެއް ކުރިއަށް ދިޔައެވެ. މިކަމުގައި ގިނަ ބަޔަކު ބައިވެރި ވިއެވެ. އަދި ޑީއާރްޕީން ބޮޑުބެރު ލޮރީއެއް މާލެތެރޭ ދުއްވާފައިވާއިރު އެމްޑީޕީންވެސް ދިދަތަކާއި ލަވަތައް ޖަހަމުން ލޮރީތަކެއް ދުއްވާފައި ވެއެވެ
ހދ. ކުޅުދުއްފުށީގައި ޑީއާރްޕީގެ ފަރާތުން މިއަދު ހަވީރު ލޮރީބުރެއް ބާއްވާފައި ވާކަމަށާއި އެމްޑީޕީން މާފޯރިގަދަ ހަރަކާތެއް ހިންގާފައި ނުވާކަމަށް ކުޅުދުއްފުށީގައި ހުރި ޖަޒީރާގެ ރިޕޯޓަރު މައުލޫމާތު ދެއެވެ
އައްޑު އަތޮޅު ހިތަދޫގައި ޑިއާރްޕީގެ ޖަލްސާއެއް ވަނީ ބާއްވާފައެވެ. މިޖަލްސާއަށް ގިނަ އަދަދެއްގެ ބަޔަކު ގޮސްފައިވާކަމަށް ވޯޓްގެ ކަންތައް ހިނގާގޮތް ބެލުމަށް ޖަޒީރާއިން އައްޑޫ އަށް ގޮސްހުރި ޖަޒީރާގެ ރިޕޯޓަރު ބުނެ އެވެ. މީގެ އިތުރުން އެމްޑީޕީން ލޮރީބުރެއްބޭއްވި ކަމަށާއި މިކަމުގައިވެސް ވަރަށް ގިނަ އަދަދެއްގެ ބަޔަކު ބައިވެރި ވެފައިވާކަމަށް ރިޕޯޓަރު ބުނެއެވެ
” 4 ފުރޮޅިލީ 90 ވަރަކަށް ވެހިކަލް ބައިވެރިވި. އަދި ވަރަށް ގިނަ ސައިކަލްތައްވެސް ބައިވެރިވި“ ރިޕޯޓަރު ބުންޏެވެ
ޖަޒީރާގެ ރިޕޯޓަރު ބުނީ އައްޑޫގައި އެއްވެސް ހަމަނުޖެހުމެއް ނުހިނގާ ކަމަށާއި ނަމަވެސް ކޮންމެސްވަރެއްގެ ހޫނު ޒުވާބެއް ހިނގާފައި ވާކަމަށެވެ
ގދ. ތިނަދޫގައި ހުރި ޖަޒީރާ ރިޕޯޓަރު ބުނީ އެރަށުގައި ޑީއާރްޕީން ލޮރީ ބުރެއް ބޭއްވި ކަމަށާއި އަދި އެމްޑީޕީން ސައިކަލް ބުރެއް ބާއްވާފައި ވާކަމަށެވެ
ނިޒާމަށް ކެމްޕޭނު ކުރުމުގެ މުއްދަތު ހަމަވެފައި ވާއިރު އެކަން ގޮސްފައިވަނީ ރަނގަޅަށް ކަމަށް ކޮމިޝަނަރ އޮފް އިލެކްޝަންސް ކދ.އަހުމަދު މަނިކު ވިދާޅުވި އެވެ
” ގަވައިދު ބުނާގޮތުން ކެމްޕޭނު ކުރުމުގެ މުއްދަތު މި ވަނީ ހަމަވެފައި. އެއްވެސް ޝަކުވާއެއް އަދިނާދޭ. އިރާދަކުރެއްވިއްޔާ ހުރިހާކަމެއް މިއަދު ދިޔައީ
ރަނގަޅަށް. ދެން ވާނެ ގޮތެއް އެނގޭނީ މާދަމާ.އެކަން ދެނެވޮޑިގެންވާނީ ހެއްދެވި ފަރާތް“ ކޮމިޝަނަރ ވިދާޅުވި އެވެ
Report:Velidhoo Community
No comments:
Post a Comment