ދިވެހި ސަރުކާރުގެ ސިޔާސަތަކީ، ރާއްޖޭގައި އިންވެސްޓްކުރާ ފަރާތްތަކަށް ފުރިހަމަ ހިމާޔަތް ލިބިދެއްވުން ކަމުގައި ރައީސުލްޖުމްހޫރިއްޔާ ވިދާޅުވެއްޖެ. ދިވެހިރާއްޖޭގެ ފަތުރުވެރިކަމުގެ ތިންވަނަ މައި މަޝްރޫޢު، ރައީސުލްޖުމްހޫރިއްޔާ މިއަދު ނެރުއްވައިދެއްވައިފި
14 އޯގަސްޓް 2007 (އަންގާރަ)
ޚަބަރު ނަމްބަރު: 453-2007
ދިވެހި ސަރުކާރުގެ ސިޔާސަތަކީ، ރާއްޖޭގައި އިންވެސްޓްކުރާ ފަރާތްތަކަށް ފުރިހަމަ ހިމާޔަތް ލިބިދެއްވުން ކަމުގައި ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖޭގެ ފަތުރުވެރިކަމުގެ ތިންވަނަ މައި މަޝްރޫޢު ނެރުއްވައިދެއްވުމަށް، ތިލަދުންމަތީ ދެކުނުބުރީ ހަނިމާދޫގައި މިއަދު ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ވައިގެ މަގުން ހަނިމާދުއަށް ވަޑައިގަތީ މިއަދު ހެނދުނުއެވެ. ރައީސުލްޖުމްހޫރިއްޔާއަށް ހަނިމާދޫ ވައިގެ ބަނދަރުން މަރްޙަބާ ވިދާޅުވީ، މިރަސްމިއްޔާތަށް ވަޑައިގެން ތިއްބެވި ވަޒީރުންނާއި، އެންމެ އުތުރުގެ ތިންއަތޮޅުގެ އަތޮޅުވެރިންނާއި، ތިލަދުންމަތީ ދެކުނުބުރީ އަތޮޅުއޮފީހުގެ ވެރިންނާއި، ކޮމިޓީތަކުގެ މެންބަރުންނާއި، ތިލަދުންމަތީ އުތުރުބުރީގެ ރަށްރަށާއި، ތިލަދުންމަތީ ދެކުނުބުރީގެ ރަށްރަށާއި، މިލަދުންމަޑުލު އުތުރުބުރީގެ ރަށްރަށް ތަމްސީލު ކުރެއްވުމަށް ވަޑައިގެން ތިއްބެވި ބޭފުޅުންނާއި، ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވެވަޑައިގަންނަވާ ބައެއް ބޭފުޅުންނާއި، ހަނިމާދޫގައި ހިނގަމުންދާ ސަރުކާރުގެ އެކި ދާއިރާތަކުގެ ވެރިންނެވެ. އަދި ހަނިމާދޫގެ ގިނަ އަދަދެއްގެ ރައްޔިތުންވެސް ރައީސުލްޖުމްހޫރިއްޔާގެ އިސްތިޤްބާލުގައި ތިއްބެވިއެވެ.
ރާއްޖޭގެ ފަތުރުވެރިކަމުގެ ތިންވަނަ މައި މަޝްރޫޢު ނެރުއްވައި ދެއްވުމުގެ ރަސްމިއްޔާތު އޮތީ ހަނިމާދޫގައި ހުންނަ ކެންޓަލޫޕޯ ރެސްޓޯރެންޓްގައެވެ. މި ރެސްޓޯރެންޓަށް ރައީސުލްޖުމްހޫރިއްޔާ ވަޑައިގަތުމުން، އެމަނިކުފާނަށް މަރްޙަބާ ދެންނެވުމުގެ ގޮތުން، ހަނިމާދޫ ރައްޔިތުން ދަނޑިޖެހުމުގެ އައިޓަމެއް ހުށަހެޅިއެވެ.
ދިވެހިރާއްޖޭގެ ފަތުރުވެރިކަމުގެ ތިންވަނަ މައި މަޝްރޫޢު ނެރުއްވައިދެއްވުމުގެ ރަސްމިއްޔާތުގައި ރައީސުލްޖުމްހޫރިއްޔާ މިއަދު ދެއްކެވި ވާހަކަފުޅުގައި، ފަތުރުވެރިކަމުގެ ޞިނާޢަތަކީ، ރާއްޖޭގެ އިޤްތިޞާދީ ތަރައްޤީއާ މިއަދު ވަރަށް ބޮޑަށް ގުޅި ލާމެހިފައިވާ ޞިނާޢަތެއް ކަމުގައި ވިދާޅުވިއެވެ. އަދި ފަތުރުވެރިކަމުގެ ތިންވަނަ މައި މަޝްރޫޢުގެ އަމާޒަކީ، ރާއްޖޭގެ އެންމެންނަށް އޭގެ މަންފާ ކުރާނެ ގޮތެއްގެ މަތިން ރާއްޖޭގެ ހުރިހާ ސަރަޙައްދުތަކެއް ހިމެނޭގޮތަށް ރާއްޖޭގެ ފަތުރުވެރިކަމުގެ ޞިނާޢަތު ތަރައްޤީ ކުރެއްވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އުތުރުގެ ސަރަޙައްދަށް ފަތުރުވެރިކަން ތަރައްޤީ ކުރެއްވުމަށް، މި މަޝްރޫޢުގައި ޚާއްޞަ ސަމާލުކަމެއް ދެއްވާފައިވާކަންވެސް ރައީސުލްޖުމްހޫރިއްޔާ ހާމަކުރެއްވިއެވެ.
ފަތުރުވެރިކަން ތަރައްޤީ ކުރުމުގެ މަސައްކަތް ކުރަމުންދާއިރު، އަޅުގަނޑުމެން ސަމާލުކަންދޭންޖެހޭ ބައެއް ކަންތައްތަކުގެ މައްޗަށްވެސް ރައީސުލްޖުމްހޫރިއްޔާ މިއަދު ބައްލަވާލެއްވިއެވެ. މިގޮތުން އެއްކަމެއްގެ ގޮތުގައި ބައްލަވާލެއްވީ، ރާއްޖޭގެ އިޤްތިޞާދީ ކުރިއެރުމާއި، ޚާއްޞަކޮށް ފަތުރުވެރިކަމުގެ ކުރިއެރުމާއި، އަޅުގަނޑުމެންގެ ޤައުމީ އެއްބައިވަންތަކަމާއި، ސުލްހަމަސަލަސްކަމާ ގުޅިފައިވާ މިންވަރުގެ މައްޗަށެވެ. މިކަމުގެ މައްޗަށް ވާހަކަފުޅު ދައްކަވަމުން، ރާއްޖޭގެ އިޖްތިމާޢީ، ސިޔާސީ އަދި އިޤްތިޞާދީ ހަމަޖެހުން ދެމެހެއްޓޭނީ، ރާއްޖޭގައި މިއޮތް އަމަންއަމާންކަމާއި ސުލްހަމަސަލަސްކަން އެގޮތުގައި ދަމަހައްޓައިގެން ކަމުގައި ވިދާޅުވިއެވެ.
ދެވަނަ ކަމެއްގެ ގޮތުގައި އެމަނިކުފާނު ބައްލަވާލެއްވީ، ރާއްޖޭގެ ފަތުރުވެރިކަން ފުޅާކުރަމުން ގެންދާއިރު ރާއްޖޭގެ މީހުން ދިރިއުޅޭ ރަށްރަށުގެ އިޤްތިޞާދީ މަސައްކަތްތަކާ ފަތުރުވެރިކަމާ ވީހާވެސް ގުޅުންބޮޑު، ރައްޔިތުންނަށް މި ޞިނާޢަތުން ލިބޭ މަންފާ އިތުރުވާނެ ގޮތެއްގެ މަތިން މި ޞިނާޢަތު ބައްޓަން ކުރުމުގެ މައްޗަށެވެ. ތިންވަނަ ކަމެއްގެ ގޮތުގައި އެމަނިކުފާނު ފާހަގަކުރެއްވީ، ފަތުރުވެރިކަމާއި މި ޞިނާޢަތުން ލިބެންހުރި ވަޒީފާގެ ފުރުޞަތުތަކުގެ މަޢްލޫމާތު، ރާއްޖޭގެ ޒުވާނުންނަށާއި ހަރު މީހުންނަށް ފޯރުވައިދީ އަދި ފަތުރުވެރިކަމުގެ ފަންނުތަކަށާއި ހުނަރުތަކަށް މީހުން ތަމްރީނު ކުރުން މިހާރަށްވުރެ ފުޅާކޮށް ކުރިއަށް ގެންދިޔުމުގެ މުހިންމުކަމެވެ. މިކަމުގެ މައްޗަށް ބައްލަވާލައްވަމުން، މިދާއިރާގެ ހުރިހާ ވަޒީފާތަކެއް ދިވެހިންނަށް ލިބޭގޮތަށް ސިޔާސަތު ރާވައިގެން، އެމަސައްކަތް އިތުރު ހިތްވަރަކާއެކު ކުރަން ޖެހިފައިވާ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. ހަތަރުވަނައަށް އެމަނިކުފާނު ބައްލަވާލެއްވީ، ފަތުރުވެރިކަން ފުޅާކުރަމުން ގެންދާއިރު، ރާއްޖޭގެ ތިމާވެށި ހިމާޔަތް ކުރުމަށް އިތުރު ހިތްވަރެއްލައި މަސައްކަތް ކުރުމުގެ މައްޗަށެވެ.
ރާއްޖޭގެ ފަތުރުވެރިކަން ހަލުވި ދުވެއްޔެއްގައި ފުޅާކުރަމުން ގެންދާއިރު، ފަތުރުވެރި މަންޒިލެއްގެ ގޮތުގައި ރާއްޖެ ހޯދާފައިވާ މަޝްހޫރުކަމާއި މަޤްބޫލުކަމަށް އެއްވެސް ބަދަލެއް ނާންނާނޭ ގޮތުގެ މަތިން މި ޞިނާޢަތާބެހޭ ތަދުބީރުތައްކޮށް، ތަރައްޤީގެ ފިޔަވަޅުތައް އެޅުމަށް ސަމާލުކަން ދިނުމަށްވެސް ރައީސުލްޖުމްހޫރިއްޔާ އިލްތިމާސް ކުރެއްވިއެވެ. އަދި ރާއްޖޭގެ ފަތުރުވެރިކަމުގެ ކުރިމަގު އުޖާލާކޮށް ބޭއްވޭނީ ސަރުކާރާއި މި ޞިނާޢަތުގެ ބައިވެރިން، އެއްވިސްނުމެއްގައި، އެއް އަމާޒަކަށް މަސައްކަތް ކޮށްގެން ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މިއަދަކީ މިއަހަރުގެ ޝަހީދުންގެ ދުވަސް ކަމަށް ވުމާއެކު، ދުވަހުގެ ޒިކުރާ އާކުރެއްވިއެވެ.
މިރަސްމިއްޔާތުގައި، މިނިސްޓަރ އޮފް ޓޫރިޒަމް އެންޑް ސިވިލްއޭވިއޭޝަން ޑޮކްޓަރ މަޙްމޫދު ޝައުޤީ ދެއްކެވި ވާހަކަފުޅުގައި، ރާއްޖޭގެ ފަތުރުވެރިކަމުގެ ޞިނާޢަތަށް މިއަހަރު 35 އަހަރު ފުރޭއިރު، މި ޞިނާޢަތުގެ ކުރިމަގު ވަރަށް އުޖާލާ ކަމަށާއި، ޞިނާޢަތު ދަނީ ކާމިޔާބީއަކަށްފަހު ކާމިޔާބީއެއް ހޯދަމުން ކަމުގައި ވިދާޅުވިއެވެ. އަދި މިޞިނާޢަތު މިއަދު މިހާބޮޑަށް ކުރިއަރާފައި މިވަނީ، އުންމީދުތަކެއްގެ މައްޗަށް ބަރޯސާވެ ތިބެ، މަސައްކަތް ކުރި ދިވެހިންގެ ބަޔެއްގެ މިންނެތް މަސައްކަތުގެ ސަބަބުން ކަމުގައި ވިދާޅުވިއެވެ. ޑޮކްޓަރ ޝައުޤީގެ ވާހަކަފުޅުގައި، ރާއްޖޭގެ ފަތުރުވެރިކަމުގެ ޞިނާޢަތު ތަރައްޤީ ކުރެއްވުމަށް، ރައީސުލްޖުމްހޫރިއްޔާ ދެއްވާ ސަމާލުކަމާއި ބަހައްޓަވާ ގާތްކަމަށްޓަކައި، އެމަނިކުފާނަށް ޝުކުރު އަދާކުރެއްވިއެވެ.
މިރަސްމިއްޔާތުގައި ތިލަދުންމަތީ ދެކުނުބުރީ އަތޮޅުވެރިޔާ އަލްފާޟިލް މުޙަންމަދުދީދީ ދެއްކެވި ވާހަކަފުޅުގައި، ރާއްޖޭގެ ފަތުރުވެރިކަން މިއަދު ވަރަށް ހަލުވި ފިޔަވަޅުތަކެއް ކުރިއަށް އަޅާފައިވާ ކަމަށާއި، ފަތުރުވެރިންގެ ވަރަށް މަޤްބޫލު މަންޒިލަކަށް ރާއްޖެ މިއަދުވަނީ ވެފައި ކަމުގައި ވިދާޅުވިއެވެ. އަދި މިއަދުގެ މިރަސްމިއްޔާތު، އުތުރުގެ ސަރަޙައްދުގައި ބާއްވަވާކަން އެއީ، މިސަރަޙައްދަށް ސަރުކާރުން ދެއްވާ އަހަންމިއްޔަތާއި، މިސަރަޙައްދަށް ފަތުރުވެރިކަން ގެންނެވުމަށް ސަރުކާރުން ކުރައްވާ މަސައްކަތްތަކުގެ އަގުހުރި ނިޝާނެއް ކަމުގައި ވިދާޅުވިއެވެ.
މިރަސްމިއްޔާތަށްފަހު އޮތް ޘަޤާފީ ދެކުޅިވަރެއް ރައީސުލްޖުމްހޫރިއްޔާ ބައްލަވާލެއްވިއެވެ. އެއީ ކުޅުދުއްފުށީ އަންހެނުންގެ ލަނގިރި ޖެހުމާއި، ކެލާ ރައްޔިތުންގެ ދަނޑިޖެހުމެވެ. އަދި މިރަސްމިއްޔާތުގައި ބައިވެރިވެވަޑައިގެންނެވި ރާއްޖޭގެ ފަތުރުވެރިކަމުގެ ދާއިރާގައި މަސައްކަތް ކުރައްވާ ޓްރެވަލް އެޖެންޓުންނާއި، ޓުއަރ އޮޕަރޭޓަރުންނާއި، ރާއްޖެއަށް އޮޕަރޭޓްކުރާ އެއަރ ލައިންތަކުގެ އިސްބޭފުޅުންނާއި، މިރަސްމިއްޔާތުގައި ބައިވެރިވެވަޑައިގެންނެވި އެކިދާއިރާތަކުގެ ބޭފުޅުންނާ ރައީސުލްޖުމްހޫރިއްޔާ ބައްދަލުކޮށްލެއްވިއެވެ.
Report: Soodh
Courtesy: The President's Office
No comments:
Post a Comment