މިހާރު މިއޮތް ސަރުކާރުން އިޚްލާސްތެރިވި ނަމަ ހައްގުތައް ހޯދައިދޭނެ ޥާހަކަ ޑީއާރުޕީން ދައްކާކަށް ނުޖެހުނީސް: އަލީ ފާއިޒް
މިހާރު މިއޮތް ސަރުކާރުން ރައްޔިތުންނަށް އިޚްލާޞްތެރިވި ނަމަ, ދިވެހިރައްޔިތުންގެ ޕާޓީން ޙައްޤުތައް ހޯދައިދޭނެ ވާހަކަ ދައްކާކަށް ނުޖެހުނީސް ކަމުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެންބަރ އަދި ރައްޔިތުންގެ ޚާއްޞަ މަޖިލީހުގެ ބ އަތޮޅު މެންބަރ އަލީ ފާއިޒް ވިދާޅުވެއްޖެ އެވެ
ރޭ އިމާދުއްދީން ސްކޫލުގައި އެމްޑީޕީން ބޭއްވި އާއްމު ބައްދަލުވުމެއްގައި ވާހަކަދައްކަވަމުން އަލީ ފާއިޒް ވިދާޅުވީ ރިޔާސީ ނިޒާމަށް ތާއީދު ކުރައްވާ ބޭފުޅުން ”ފުރިހަމަ ރިޔާސީ“ ނިޒާމެއް ގެންނަވާ ވާހަކަ ދައްކަވާ ކަމަށާއި ފުރިހަމައެއް, މެދުމިނެއް, ކުޑައެއް ނޯންނަ ކަމަށާއި އޮންނަނީ ރިޔާސީ ނިޒާމު ކަމުގަ އެވެ. އެހެންކަމުން ފުރިހަމަ ރިޔާސީ ނިޒާމެއް ގެންނަން އުޅޭ ވާހަކަ ދައްކަނީ އޮޅުވާލަން ކަމަށެވެ
”ކާކުތޯ އެދުނީ ފުރިހަމަ ރިޔާސީ ނިޒާމެއް ނުގެންނަން. 29 އަހަރު ވެރިކަން ކުރިއިރު ފުރިހަމަ ނޫން ރިޔާސީ ނިޒާމެއް ގެންގުޅުނީ ކީއްކުރަން. ދެންކޮން ވާހަކަތަކެއްތޯ މިދައްކަނީ“ އަލީ ފާއިޒް ވިދާޅުވި އެވެ
އަލީ ފާއިޒް ވިދާޅުވީ މިކަންތައްތަކެއް މެދުވެރިވެގެން މިއުޅެނީ ރައްޔިތުންނަށް ލިބެން ޖެހޭ އަސާސީ ޙައްޤުތައް އަދާކޮށް ނުދެވި ރައްޔިތުންނަށް އުފާވެރި ދިރިއުޅުމެއް ނޫޅެވިގެން ކަމަށާއި އެކަންކަން ކޮށްނުދީފައި އެތައް އަހަރު ވެރިކަން ކުރުމަށްފަހު މިހާރު ތާއީދު ކުރާ ނިޒާމް ކާމިޔާބު ކުރުމަށްޓަކައި ފަޤީރުކަން ނައްތާލެވޭނެޔޭ, ބާރުތައް ވަކިވެޔޭ, ރައްޔިތުންގެ ޙައްޤުތަކޭ ދެއްކޭކަށް ނޯންނާނެ ކަމަށެވެ
” އެމީހުން ވެރިކަން ކުރީ މިއޮތް ހުރިހާ ދުވަހު. އެމީހުން ރައްޔިތުންގެ ޙައްޤުތައް ހޯދައި ނުދީ އޮތީ. އެމީހުން ރައްޔިތުން ފަޤީރުކޮށްލީ. މިހުރިހާ ކަމެއް މިކުރީ އެމީހުން. ދެން ކޮންވާހަކަތަކެއްބާ މިދައްކަނީ އެކަންތައްތައް ކޮށްދޭނަމޭ. އެކަންކަން ކޮށްދިންނަމަ މިއަދު އެމީހުންނަށް ދެން ހައްޤުތައް ހޯދައިދޭ ވާހަކައެއް ދައްކާކަށް ނުޖެހުނީސް“ އަލީފާއިޒް ވިދާޅުވި އެވެ
އަލީފާއިޒް ވިދާޅުވީ ރިޔާސީ ނިޒާމެއް އަތުވެއްޖިއްޔާ މިހުރިހާ ދުވަހު ކުރި އިސްލާހް ގެނައުމުގެ މަސައްކަތް ގާވާނެ ކަމަށާއި ގާދޫކޮލުން އެމަސައްކަތް ނިކުމެގެން ދާނެ ކަމަށެވެ
ރޭގެ ޖަލްސާގައި ވާހަކަދެއްކެވި އެހެން މެންބަރުންގެ ތެރެއިން ރައްޔިތުންގެ ޚާއްޞަ މަޖިލީހުގެ ދ އަތޮޅު މެންބަރ މުހައްމަދު ރިޔާޒް ވިދާޅުވީ ރިޔާސީ ނިޒާމް ގެންނަން މަސައްކަތް ކުރަނީ ބައިތުލް މާލުން އެކިގޮތްގޮތުން ފައިދާ ލިބޭ މީހުން ކަމަށާއި މިފަހަރުގެ ވޯޓާ ކުޅޭތަން ބަލާކަށް ނުތިބޭނެ ކަމަށާއި ވޯޓާ ކުޅެފިއްޔާ ވަރަށް ގޯސްވާނެ ކަމަށެވެ
ލ އަތޮޅު މެންބަރ މޫސާމަނިކު ވިދާޅުވީ ބަރުލަމާނީއަށް ތާއީދު ކުރީ ހަމައެކަނި އެމްޑޕީން ކަމަށާއި ރިޔާސީ ނިޒާމެއް އައްޔާ އެހެން ޕާޓީތަކުން ރާއްޖޭގައި އަދްލު އިންސާފް ޤާއިމް ކޮށްދޭން ޖެހޭނެ ކަމަށެވެ. އެޕާޓީތަކުން އެޒިންމާ ނަގަން ޖެހޭނެ ކަމަށެވެ
ޙާފިޒް ޒަކީ ވިދާޅުވީ އިސްލާމްދީނާ އެންމެ ގާތްކުރާ ނިޒާމަކީ ރިޔާސީ ނިޒާމު ކަމަށް ބުނާ ބުނުމަކީ ކަނޑައެޅިގެން ދޮގެއް ކަމަށާއި އެއްވެސް ނިޒާމަކީ ދީނާ ގުޅުން ހުރި ނިޒާމެއް ނޫން ކަމަށެވެ. ނަމަވެސް އިސްލާމްދީނުގެ ކުލަވަރު އެންމެބޮޑަށް ހުރީ ބަރުލަމާނީ ނިޒާމަކުން ކަމަށް ގިނަ ދީނީ ޢިލްމުވެރިން ވިދާޅުވެފައިވާ ކަމުގައި ޒަކީ ވިދާޅުވިއެވެ
ރޭގެ ޖަލްސާއަކީ މިފަހަކަށް އައިސް އެމްޑީޕީން ބޭއްވި ޖަލްސާތަކުގެ ތެރެއިން ގިނަ އަދަދަކަށް މީހުން ހަޒިރުވި ޖަލްސާއެކެވެ. ހޯލާއި ގޯތިތެރެ އެއްކޮށް އޮތީ ފުރިފަ އެވެ
No comments:
Post a Comment