N. Velidhoo Community

ތަރައްޤީއާއި ތިމާވެށީގެ ވަރަށް ރަނގަޅު މީޒާނެއް އޮންނަންވާނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެ. ރާއްޖޭގެ ތިމާވެށްޓަށް އެކަށީގެންވާ ޚިދްމަތް ކުރައްވާ ފަރާތްތަކަށް ރައީސުލްޖުމްހޫރިއްޔާ ދެއްވާ ”ފެހިފަތް“ 6 ފަރާތަކަށް މިއަދު ދެއްވައިފި. ސިޔާސީ އިޞްލާޙީ ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށާއި، އެ ޕްރޮގްރާމަކީ ކާމިޔާބު ޕްރޮގްރާމެއް ނޫންކަމަށް ބުނާނެ ޖާގައެއް ނޯންނާނެކަމަށް ރައީސުލްޖުމްހޫރިއްޔާ ވިދާޅުވެއްޖެ

6 އޯގަސްޓް 2007 (ހޯމަ)

ޚަބަރު ނަމްބަރު: 441-2007

ތަރައްޤީއާއި ތިމާވެށީގެ ވަރަށް ރަނގަޅު މީޒާނެއް އޮންނަންވާނެކަމަށް، ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، މިއަހަރުގެ ތިމާވެށި ދުވަސް ފާހަގަކުރެއްވުމަށް، އަރިއަތޮޅު ދެކުނުބުރީ މަހިބަދޫގައި މިއަދު ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ. ރައީސުލްޖުމްހޫރިއްޔާ ވިދާޅުވި ގޮތުގައި، ތިމާވެށްޓަށް ސަމާލުކަންދީގެން، ތަރައްޤީއާއި އިޤްތިޞާދީ މަސައްކަތްތައް ކުރިޔަށް ގެންދިޔުމަކީ، ވަރަށް މުހިންމު ކަމެކެވެ.

ތިމާވެށި ދުވަސް ފާހަގަކުރެއްވުމަށް، މަހިބަދޫގައި ބޭއްވެވި ޖަލްސާގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ މަހިބަދުއަށް ވަޑައިގަތީ، މިއަދު ހެނދުނުއެވެ. އެމަނިކުފާނަށް މަހިބަދޫން ދެންނެވީ ވަރަށް ހޫނު މަރްޙަބާއެކެވެ. ރައީސުލްޖުމްހޫރިއްޔާ މަހިބަދުއަށް ފައިބާވަޑައިގެންނެވިއިރު އެމަނިކުފާނުގެ އިސްތިޤްބާލުގައި، ތިމާވެށި ދުވަހުގެ އިޙްތިފާލުތަކުގައި ބައިވެރިވެވަޑައިގަތުމަށް، މަހިބަދުއަށް ވަޑައިގެން ތިއްބެވި ޢިއްޒަތްތެރިންނާއި، ސަރުކާރުގެ އިސްބޭފުޅުންނާއި، އަރިއަތޮޅު ދެކުނުބުރީ އަތޮޅުވެރިޔާ އަލްފާޟިލް ޢަބްދުﷲ ޖަމީލާއި، އަރިއަތޮޅު ދެކުނުބުރީ އަތޮޅު އޮފީހުގެ ވެރިންނާއި، މަހިބަދޫގެ ވެރިންނާއި، އެ އަތޮޅުގެ ރަށްރަށުގެ ވެރިންނާއި، ކޮމިޓީތަކުގެ މެންބަރުންނާއި، މަހިބަދޫ ރައްޔިތުން ތިއްބެވިއެވެ.

އަރިއަތޮޅު ދެކުނުބުރީ އަތޮޅު ތަޢްލީމީ މަރްކަޒުގެ ދަރިވަރުން މަރްޙަބާގެ ލަވައެއް ދެންނެވިއެވެ.

މިއަދުގެ ޖަލްސާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އަޅުގަނޑުމެން ތަރައްޤީއަށް ކުރާ މަސައްކަތްތަކުން، ތިމާވެށްޓާއި ޤުދްރަތީ ވަސީލަތްތަކަށް ގެއްލުން ލިބިގެން ނުވާނެކަމަށާއި، ކުރާ މަސައްކަތަށް ހީނަރުކަން ލިބި، ކުރިމަގު ބަނަވާކަމަށް ވަނީނަމަ، އެ މަސައްކަތް އަޅުގަނޑުމެން ކޮށްގެން ނުވާނެކަމުގައި ވިދާޅުވިއެވެ.

ތިމާވެށީގެ ދާއިރާގެ ޤާބިލުކަން އިތުރުކުރުމުގެ ބޭނުންތެރިކަމުގެ މައްޗަށް ރައީސުލްޖުމްހޫރިއްޔާ ބައްލަވާލައްވަމުން، ތަރައްޤީގެ އެކި ކަންތައްތައް އިތުރުވަމުންދާއިރު، އެ މަސައްކަތްތައް ހިންގުމުގައި، ތިމާވެށީގެ ފަންނީ މާހިރުންގެ ލަފައާއި އިރުޝާދު ވަރަށް މުހިންމުކަން ބަޔާންކުރެއްވިއެވެ. ތިމާވެށި ރައްކާތެރިކޮށް ޙިމާޔަތް ކުރުމަށްޓަކައި، ކުޑަކުދިންނާއި، ކިޔަވާކުދިންނާއި، ބޮޑެތި މީހުންނަށާއި، ދުވަސްވީ މީހުންނަށް މަޢްލޫމާތުދީ ހޭލުންތެރިކަން އިތުރުކުރުމުގެ ބޭނުންތެރިކަމުގެ މައްޗަށް ރައީސުލްޖުމްހޫރިއްޔާ ވާހަކަފުޅު ދައްކަވަމުން، ދިރިއުޅުމުގެ އާދަތައް، ތިމާވެށްޓާ ރައްޓެހި ގޮތަކަށް ބައްޓަން ކުރުމަށް އެދިވަޑައިގެންނެވިއެވެ. އަދި ޚަބަރުފަތުރާ ވަސީލަތްތަކުން މިކަމަށް ވަރަށް ބޮޑު އަހަންމިއްޔަތެއް ދެއްވުމަށް އިލްތިމާސް ކުރެއްވިއެވެ.

ގަސްއިންދުމުގެ މުހިންމުކަމުގެ މައްޗަށް ރައީސުލްޖުމްހޫރިއްޔާ ބައްލަވާލައްވަމުން، ގަސްއިންދުމަށް އަޅުގަނޑުމެން އެންމެންވެސް ލޯބިކުރުމަށާއި، ހެދިފައި ހުރި ގަސްތައް ޙިމާޔަތްކޮށް، ގަހެއް ނުކަނޑާވާނެ ގޮތެއް އޮތްތޯ ބަލައިގެން މަސައްކަތްކުރުމަކީ، ތިމާވެށްޓަށް ކޮށްދެވޭ ވަރަށް ބޮޑު ޚިދްމަތެއް ކަމަށް ނުވެނުދާނެކަމަށް ވިދާޅުވިއެވެ.

މިއަދުގެ ޖަލްސާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އެމަނިކުފާނު އިޢްލާނު ކުރައްވާފައިވާ ސިޔާސީ އިޞްލާޙީ ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށާއި، އެ ޕްރޮގްރާމަކީ ކާމިޔާބު ޕްރޮގްރާމެއް ނޫންކަމަށް ބުނާނެ ޖާގައެއް ނެތްކަމަށް ވިދާޅުވިއެވެ. މިރޮނގުން ރައީސުލްޖުމްހޫރިއްޔާ ވާހަކަފުޅު ދައްކަވަމުން، ސިޔާސީ އިޞްލާޙީ ޕްރޮގްރާމުގެ ދަށުން މިހާތަނަށް ހާސިލު ކުރެވިފައިވާ ކާމިޔާބީތަކުގެ މައްޗަށާއި، އަޅުއްވާފައިވާ އެކި ފިޔަވަޅުތަކުގެ މައްޗަށް ވަރަށް ތަފްސީލުކޮށް ބައްލަވާލެއްވިއެވެ. އަދި އިޞްލާޙީ ޕްރޮގްރާމް ހުއްޓުމަކަށް ނާންނާނެކަމަށާއި، އެ ޕްރޮގްރާމް ހިނގަމުންދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގައި އޮންނަން ފެންނަ ވެރިކަމުގެ ނިޒާމު ކަނޑައެޅުމަށްޓަކައި މިމަހުގެ 18 ވަނަ ދުވަހު ނަގާ އާންމު ވޯޓުގައި، ވޯޓުލުމުގެ ޝަރްޠު ހަމަވާ، އުމުރުން 18 އަހަރު ފުރިފައިވާ ހުރިހާ ރައްޔިތުން ވޯޓު ދިނުމަށް، މިއަދުވެސް އެދިވަޑައިގެންނެވިއެވެ.

މިއަދުގެ ޖަލްސާގައި، ރާއްޖޭގެ ތިމާވެށްޓަށް އެކަށީގެންވާ ޚިދްމަތް ކުރައްވާ ފަރާތްތަކަށް ދެއްވާ ”ފެހިފަތް“ ރައީސުލްޖުމްހޫރިއްޔާ ދެއްވިއެވެ. މިއަހަރު ފެހިފަތް ލިބުނީ، އޭޑަލް ވައިސް އެއަރ އަށާއި، އައްޑުއަތޮޅު ފޭދޫ ސްކޫލަށާއި، އެކޯ ކެއަރ އަށާއި، މިއަދު ނޫހަށާއި، ސޮނީ ހާޑްވެއަރ އަށާއި، އަރިއަތޮޅު ދެކުނުބުރީ ދިގުރަށަށެވެ. ރައީސުލްޖުމްހޫރިއްޔާގެ ވާހަކަފުޅުގައި، އެފަރާތްތަކަށް ތަހުނިޔާ ވިދާޅުވެ، ޝުކުރު އަދާކުރެއްވިއެވެ. އަދި އެ މަސައްކަތުގައި އިތުރަށް ކުރިއަށް ވަޑައިގަތުމަށް ހިތްވަރު ދެއްވިއެވެ.

މިއަދު ޖަލްސާގައި، ތިމާވެށީގެ ރޮނގުން ދިވެހިންގެ އިލްތިމާސް ހުށަހެޅުން އޮތެވެ. މި އިލްތިމާސް އިސްވެ ހުށަހެޅީ، އަރިއަތޮޅު ދެކުނުބުރީ ތަޢްލީމީ މަރްކަޒުގެ ދަރިވަރުންކޮޅެކެވެ.

ތިމާވެށި ދުވަހުގެ މުނާސަބަތާ ގުޅިގެން، ބޭއްވުނު ބައެއް މުބާރާތްތަކުން ވަނަ ހޯދި ފަރާތްތަކަށް އިނާމު ދެއްވުންވެސް މިއަދުގެ ޖަލްސާގައި އޮތެވެ. އިނާމުތައް ދެއްވީ، މިނިސްޓަރ އޮފް އެންވަޔަރަންމަންޓް، އެނަރޖީ އެންޑް ވޯޓަރ އަލްފާޟިލް އަޙްމަދު ޢަބްދުﷲ އެވެ.

މިއަހަރުގެ ތިމާވެށި ދުވަހުގެ ރަސްމިއްޔާތުތައް، މަހިބަދޫގައި ބޭއްވެވުމުގެ ކަންތައްތައް، މަހިބަދޫން އިންތިޒާމު ކުރައްވާފައިވާ ފުރިހަމަކަމުގެ އަގު ވަޒަން ކުރެއްވުމުގެ ގޮތުން، މަހިބަދުއަށް ދެއްވާ ހަނދާނީ ލިޔުން ދެއްވީވެސް އަލްފާޟިލް އަޙްމަދު ޢަބްދުﷲ އެވެ.

މިއަދުގެ ޖަލްސާގައި، މަރްޙަބާ ދެންނެވުމުގެ ގޮތުން މިނިސްޓަރ އޮފް އެންވަޔަރަންމަންޓް، އެނަރޖީ އެންޑް ވޯޓަރ އަލްފާޟިލް އަޙްމަދު ޢަބްދުﷲ ދެއްކެވި ވާހަކަފުޅުގައި، މިއަދުގެ ޖަލްސާގައި ހުށަހެޅުނު އިލްތިމާސަކީ، ވަރަށް މުހިންމު ތާރީޚީ އިލްތިމާސެއްކަމަށް ވިދާޅުވިއެވެ. އެމަނިކުފާނުގެ ވާހަކަފުޅުގައި، ރާއްޖެއަށް ކުރިމަތިވަމުންދާ ތިމާވެށީގެ މައްސަލަތައް، ބައިނަލްއަޤްވާމީ ސަމާލުކަމަށް ގެންނެވުމަށް ރައީސުލްޖުމްހޫރިއްޔާ ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވައި ޝުކުރު ދެންނެވިއެވެ. މިނިސްޓަރ އަޙްމަދު ޢަބްދުﷲ ގެ ވާހަކަފުޅުގައި، ތިމާވެށީގެ ޙާލަތު މިހާރު އެންމެންނަށް ވަޒަންކުރެއްވޭކަމަށްވެސް ވިދާޅުވިއެވެ.

ފެހިފަތް ލިބުނު ފަރާތްތަކުގެ ތެރެއިން ސޮނީ ހާޑްވެއަރގެ ފަރާތުން މި ޖަލްސާގައި އަލްފާޟިލް ޙަސަން ހަމީޒު ވާހަކަ ދެއްކެވިއެވެ.

ޝުކުރު ދެންނެވީ، އަރިއަތޮޅު ދެކުނުބުރީ އަތޮޅުވެރިޔާ އަލްފާޟިލް ޢަބްދުﷲ ޖަމީލެވެ.

މި ޖަލްސާގައި ރައީސުލްޖުމްހޫރިއްޔާ ބައިވެރިވެވަޑައިގަތުމަށްފަހު، ހޭޅިފަށް އާލާކުރުމުގެ ޕްރޮގްރާމެއް މިއަދު މެންދުރުފަހު ފަށްޓަވައިދެއްވިއެވެ. ހޭޅިފަށް އާލާކުރުމުގެ ޕްރޮގްރާމް ފަށްޓަވައިދެއްވުމުގެ ގޮތުން މަހިބަދޫގެ ހޭޅިފަށުގައި ރައީސުލްޖުމްހޫރިއްޔާ ގަހެއް އިންދަވައި ދެއްވިއެވެ.