އަތޮޅުތަކުގެ ކަވަރޭޖް: ރިޔާސީ ނިޒާމުގެ ފޯރި މުޅިރާއްޖޭގައި

13 އޯގަސްޓް 2007
ޑީއާރުޕީން ތާއީދު ކުރާ ފުރިހަމަ ރިޔާސީ ނިޒާމެއް ކާމިޔާބުކުރުމަށް ޕާޓީގެ މެންބަރުން ވަރަށް ފޯރީގައި މަސައްކަތްކުރައްވަމުން އެބަގެންދަވައެވެ. މިގޮތުން ހއ. އިން ފެށިގެން އައްޑުއާއި ދެމެދުގައިވާ ޕާޓީގެ ގޮފިތަކުގެ މެންބަރުންނާއި ޕާޓީއަށް ހެޔޮ އެދިވަޑައިގަންނަވާ ބޭފުޅުން ގެންދަވަނީ ވަރަށް ފޯރީގައި ރިޔާސީ ނިޒާމަށް ތާއީދު ހޯއްދެވުމުގެ މަސައްކަތްކުރައްވަމުންނެވެ. އަދި އަތޮޅުތަކަށް ވަޑައިގަންނަވަމުންދާ ޕާޓީގެ މެންބަރުންނާއި އެކު މިކެންޕޭން މިހާރު ވަނީ އެންމެ ފަހުގެ މަރުޙަލާއަށް ވާޞިލުވެފައެވެ. ޕާޓީގެ މެންބަރުންނާއި އަދި ޕާޓީއަށް ތާއީދުކުރައްވާ އެންމެހާފަރާތްތަކުގެ އެއްބާރުލުމާއި އެކު "ރިޔާސީ ނިޒާމު" ވަރަށް ބޮޑު އަޢުލަބިއްޔަތަކުން ކާމިޔާބު ކުރެއްވޭނޭ ކަމަށް އަތޮޅުތަކަށް ވަޑައިގަންނަވަމުންދާ ޕާޓީގެ އިސްމެންބަރުން ހާމަކުރައްވައެވެ.

ފާއިތުވި ދެތިން ދުވަހުގައި އެކަނިވެސް އަތޮޅުތަކުގެ ތެރެއިން ހއ. ހދ. ށ. ރ. ބ. ޅ ކ. އއ. އދ. ތ. ލ. ގއ. ގދ. ޏ. އަދި ސ އަތޮޅަށް ޕާޓީގެ ވަފުދުތައް ވަނީ ޒިޔާރަތް ކުރައްވާފައެވެ.
ހއ. އަދި ހދ އަތޮޅު
ހއ. އަދި ހދ. ގެ ރަށްތަކަށް ވަޑައިގެންނެވީ ޕާޓީގެ ކައުންސިލްގެ މެންބަރު އަލްއުސްތާޛު މުޙައްމަދު ނަޝީދުއާއި އަލްފާޟިލް އިލްޔާސް އިބްރާހީމެވެ. މިދެ ބޭފުޅުންނާއި އެކު ޕާޓީގެ އިތުރު އެކްޓިވިސްޓުންވެސް މިދަތުރުތަކުގައި ބައިވެރިވެ ވަޑައިގެންނެވިއެވެ. މި ބޭފުޅުންގެ ވަފަދު ވަނީ ހއ. ގެ ވަރަށް ގިނަ ރަށްތަކަށާއި އެކު ހދ. ގެ ހުރިހާރަށަކަށްވެސް ޒިޔާރަތްކޮށްފައެވެ. މި ޒިޔާރަތްތަކުގައި އެދެއަތޮޅުގެ ރަށްތަކުގައި ޚަރަކާތްތެރިވާ ޕާޓީގެ ގޮފިތަކުގެ އެއްބާރުލުމާއި އެހީތެރިކަން ވަރަށް ބޮޑަށް ލިބިގެން ގޮސްފައިވެއެވެ. ހދ. ކުޅުދުއްފުށި އަދި ހއ. ކެލާ ހދ. ވައިކަރަދޫފަދަ ރަށްތަކުން ޕާޓީގެ ކެންޕޭނަށް ވަރަށް ބޮޑު ތަރްޚީބެއް ލިބިފައިވެއެވެ.

ށ. އަތޮޅު
ށ. އަތޮޅުގެ ރަށްތަކަށް ވަޑައިގެންނެވި ވަފުދުގެ އިސްބޭފުޅަކަށް ވަޑައިގެންނެވީ ށ. އަތޮޅުގެ ޢިއްޒަތްތެރި މެންބަރު އަދި ޕާޓީގެ ކައުންސިލްގެ މެންބަރު އަލްފާޟިލް މުޙައްމަދު ހުސައިން އެވެ. އެމަނިކުފާނުގެ އިތުރުން ށ. އަތޮޅުގެ ޚާއްޞަ މަޖިލީހުގެ މެންބަރު އަދި ޕާޓީގެ ކައުންސިލްގެ މެންބަރު އަލްއުސްތާޛާ ލުބުނާ މުޙައްމަދު ޒާހިރު ޙުސައިން އާއި ޕާޓީގެ ކައުންސިލްގެ މެންބަރު އަލްފާޟިލް ޢިމާދު ޞޯލިޙް އަދި އެއަތޮޅުގެ އަތޮޅުވެރިޔާ އަޙްމަދު ޤާސިމް ހިމެނިވަޑައިގަންނަވައެވެ. މި ދަތުރުގައި ށ. ކޮމަންޑޫގައި ޕާޓީގެ އޮފީހެއް ޤާއިމް ކުރެއްވުންވެސް ކުރިއަށްގެންދެވުނެވެ.

ނ. އަތޮޅު
ނ.އަތޮޅަށް ވަފުދެއް ޒިޔާރަތް ކުރެއްވުން މިހާރު ދަނީ ތައްޔާރުވަމުންނެވެ. މިއަތޮޅުގެ ހުރިހާ ރަށެއްގައިވެސް ރިޔާސީ ކެންޕޭން ޕާޓީގެ މެންބަރުން ގެންދަވަނީ ކުރައްވަމުންނެވެ. ޚާއްޞަ ކޮށް މަނަދޫ އަދި ވެލިދޫއާއި ހޮޅުދޫގައިވެސް ވަރަށްފޯރިއާއި އެކު ޙަރަކާތްތަށް ކުރިއަށް އެބަގެންދަވައެވެ.
ރ.
ރ. އަތޮޅުގެ ރަށްތަކުގައި ރިޔާސީ ކެންޕޭން ޚަރަކާތްތަކަށް ވަޑައިގެންނެވީ ރާއްޖޭގެ ޚާރިޖީ ވަޒީރު އަދި ޕާޓީގެ އިސްމެންބަރު ޑރ. އަޙްމަދު ޝަހީދުއެވެ. އެމަނިކުފާނުގެ އަރިއަހުގައި ޕާޓީގެ އެކްޓިވިސްޓުންވެސް ރ.އަތޮޅަށް ފާއިތުވިހަފްތާގައި ދެފަހަރެއްގެ މަތިން ވަނީ ޒިޔާރަތްކުރައްވާފައެވެ. ރ. އަތޮޅުގެ ރިޔާސީ ތާއީދު އޮތީ ވަރަށް ފޯރީގައި ކަމަށް މަޢުލޫމާތު ލިބެއެވެ.

ބ. އަތޮޅު
ބ.އަތޮޅުގައި ރިޔާސީ ކެންޕޭން ކުރައްވަމުން ގެންދަވަނީ ބ. އަތޮޅުގެ ރައްޔިތުންގެ މަޖިލީހުގެ މެންބަރު އަދި ޕާޓީގެ އެއްނާއިބު ޒަޢީމް ކަމުގައިވާ އަލްފާޟިލް އަޙްމަދު ތަސްމީން ޢަލީގެ ބެއްލެވުމުގެ ދަށުންނެވެ. އެމަނިކުފާނުގެ ކެންޕޭން ޓީމުގެ ބޭފުޅުން ވަނީ އެއަތޮޅުގައި ވަރަށް ބޮޑެތި މަސައްކަތްތަކެއް ރިޔާސީ ނިޒާމަށް ތާއީދު ހޯއްދެވުމަށް ކުރައްވާފައެވެ. ފާއިތުވި ދެތިން ދުވަހުގެ ތެރޭގައި އެއަތޮޅުގެ ބޮޑެތި އާބާދީ ތަކުގައި ރިޔާސީ ނިޒާމުގެ ޖަލްސާތަށް ވަނީ ބޭއްވިފައެވެ. މި ގޮތުން ޕާޓީގެ ކައުންސިލް މެންބަރު އަލްފާޟިލް ހޯރަފުށީ މުޙައްމަދު ސަލީމް އިސްވެ ހުންނަވައިގެން ވަރަށް މުހިންމު ބައްދަލުވުންތަކެއް ވަނީ ބޭއްވެވިފައެވެ. ބ. އަތޮޅުން ރިޔާސީ ނިޒާމަށް 80 ޕަސެންޓްއަށްވުރެ ބޮޑު ތާއީދެއް ލިބޭނޭ ކަމަށް ސަލީމް ވިދާޅުވިއެވެ.

ޅ. އަތޮޅު
ޅ.އަތޮޅުގެ ރަށްތަކުގައި ރިޔާސީ ނިޒާމުގެ ކެންޕޭންހިންގެވުމަށް ޕާޓީގެ ޒުވާނުންގެ ގޮފިން ފާއިތުވި ހަފްތާގައި ކުރިއަށް ގެންދެވުނު ސްޓޭޖް ޝޯތަކަށް ފަހު ވަރަށް ބޮޑު ތަރްޚީބެއް ރިޔާސީ ނިޒާމަށް އަންނަނީ ލިބެމުންނެވެ. އެ ޝޯތަކުގައި ރިޔާސީ ނިޒާމަށް ދެވުނު މަޢުލޫމާތުގެ އަލީގައި ވަރަށް ބޮޑު ބަޔަކަށް ވަނީ ދެނިޒާމުގެ ތަފާތު އޮޅުން ފިލާފައެވެ. ރިޔާސީ ނިޒާމަކީ ރައްޔިތުންގެ ސީދާ ވޯޓަކުން ވެރިޔަކު ހޮވޭނޭ ހަމައެކަނި ނިޒާމު ކަމަށް ޅ.އަތޮޅުގެ ރައްޔިތުން މިހާރު ވަނީ ޤަބޫލް ކޮށް ރިޔާސީ ނިޒާމް އަށް ވަރަށް ބޮޑަށް ދީލާލާފައެވެ. ޅ.އަތޮޅަށް ޒިޔާރަތްކުރައްވާ ވަފުދުގެ އިސްބޭފުޅަކަށް ވަޑައިގެންނެވީ ރާއްޖޭގެ ޕްލޭނިންގް މިނިސްޓަރ އަދި ޕާޓީގެ އިސްމެންބަރު އަލްފާޟިލް ޙަމްދޫން ޙަމީދުއެވެ. އެމަނިކުފާނާއި އެކު ޕާޓީގެ ކައުންސިލްގެ އަންހެނުންގެ ގޮފީގެ ރައީސާ އަލްއުސްތާޛާ ޢާއިޝަތު ޢާޒިމާ ޝަކޫރު ހިމެނިވަޑައިގަންނަވައެވެ. އިސް އެކްޓިވިސްޓުން ކަމުގައިވާ އަޢްޝައިޙް ޤުބާދުއާއި އަދިވެސް ބައެއް މެންބަރުން މިހާރުގެންދަވަނީ ޅ.އަތޮޅުގެ ރަށްތަކަށް ޒިޔާރަތް ކުރައްވަމުންނެވެ. މަޢުލޫމާތު ލިބިފައިވާ ގޮތުގައި ޅ.އަތޮޅުން 90 ޕަސެންޓް ރިޔާސީއަށް ތާއީދު ލިބޭނެއެވެ.

ކ. އަތޮޅު
ކ.އަތޮޅުގެ ރަށްތަކުގެ ތެރެއިން ގުރައިދޫގައާއި ކާށިދޫ އަދި ތުލުސްދޫގައި ރިޔާސީ ނިޒާމް އަށް ތާއީދު ހޯއްދެވުމަށް ވަނީ ބައްދަލުވުމެއް ބޭއްވެވިފައެވެ. މި ބައްދަލުވުންތަކަށް ވަޑައިގެންނެވީ ޕާޓީގެ އިސްމެންބަރު ޑރ. އަޙްމަދު ޝަހީދުއާއި އަދި ޕާޓީގެ މެންބަރު އަލްފާޟިލް އަބްދުއްރަޝީދު ހުސައިން އެވެ. އަދި ޕާޓީގެ ކައުންސިލްގެ ދެ މެންބަރުން ކަމުގައިވާ އަލްފާޟިލާ ޢާއިޝަތު މުޙައްމަދު ދީދީއާއި އަލްފާޟިލް ޢިމާދު ޞޯލިޙްވެސް މިދަތުރުގެ ބައެއް މަންޒިލްތަކަށް ވަނީ ވަޑައިގަންނަވާފައެވެ. ކ. އަތޮޅަކީ ޑީއާރުޕީއަށް ވަރަށްބޮޑު ތާއީދެއް އޮންނަ އަތޮޅެކެވެ. އެހެން ކަމުން ރިޔާސީ ނިޒާމަށް ތާއީދުކުރައްވާ ވަރަށް ގިނަ ބަޔަކު މިއަތޮޅުގައި އެބަތިއްބެވިއެވެ.

އއ. އަތޮޅު
އަރިއަތޮޅު އުތުރުބުރީގެ ރަށްތަކަށް ރިޔާސީ ނިޒާމްގެ ކެންޕޭން ދަތުރުގައި އިސްބޭފުޅަކަށް ވަޑައިގެންނެވީ ދިވެހި ރާއްޖޭގެ ހޯމް މިނިސްޓަރ އަދި ޕާޓީގެ އިސް މެންބަރު އަލްފާޟިލް ޢަބްދުއްﷲ ކަމާލުއްދީންއެވެ. އަދި މިދަތުރުފުޅުގައި އެއަތޮޅު ގެ ރައްޔިތުންގެ މަޖިލީހުގެ މެންބަރު އަދި ޕާޓީގެ ކައުންސިލްގެ މެންބަރު އަލްފާޟިލް އަޙްމަދު ޒުބައިރާއި، އއ. ގެ އަނެއް މެންބަރު އަލްފާޟިލް ޙުސައިން މުޙައްމަދު ހިމެނިވަޑައިގަންނަވައެވެ. މިބޭފުޅުންގެ ވަފުދު ވަނީ އއ ގެ ހުރިހާރަށަކަށް ޒިޔާރަތްކޮށް ރިޔާސީ ނިޒާމަށް ވަރަށް އެކަށީގެންވާ ތާއީދެއް އެއަތޮޅުގެ ރަށްތަކުން ހޯއްދަވާފައެވެ.
އދ. އަތޮޅު
އދ. އަތޮޅުގައި ވަރަށް ފޯރީގައި ކެންޕޭން ކުރިއަށް އެބަގެންދަވައެވެ. މިއަތޮޅަށް ފާއިތުވި ހަފްތާގައިވެސް ވަނީ ދަތުރެއްކުރެވިފައެވެ. މިއަތޮޅުގެ ކެންޕޭންގައި އެންމެ ފޯރިގަދަކޮށް އުޅެނީ އދ.ގެ ވެރިކަން ކުރާރަށް މަހިބަދޫއެވެ. ފާއިތުވިހަފްތާގައި ޕާޓީގެ ޒަޢީމް އިފްތިތާޙް ކޮށްދެއްވި މަހިބަދޫ ޑީއާރުޕީ އޮފީހުގެ ބެއްލެވުމުގެ ދަށުން ވަރަށް ބޮޑަށް ނިޒާމް ޕްރޮމޯޓް ކުރެއްވުމުގެ މަސައްކަތް އެއަތޮޅުގައި އެބަހިންގަވައެވެ.

ތ. އަތޮޅު
ތ. އަތޮޅުގައި ރިޔާސީ ކެންޕޭން އަށް ވަޑައިގެންނެވީ ޕާޓީގެ ކައުންސިލްގެ މެންބަރު އަދި ރާއްޖޭގެ ކޮންސްޓްރަކްޝަން މިނިސްޓަރ އޮނަރަބަލް އަލްފާޟިލް މުޙައްމަދު މަޢުރޫފް ޖަމީލް އެވެ. އެމަނިކުފާނުގެ އިތުރުން ރާއްޖޭގެ ޓްރާންސްޕޯޓް މިނިސްޓަރ އޮނަރަބަލް އަލްފާޟިލް މުޙައްމަދު ސަޢީދާއި އަދިޕާޓީގެ ބެއެއް އިސްއެކްޓިވިސްޓުންވެސް ތ. އަތޮޅުގެ ރަށްތަކަށް މިހާރު ދަނީ ޒިޔާރަތްކުރައްވަމުންނެވެ. ތ. އަތޮޅުން ވަރަށް ބޮޑު ތަރްޙީބެއް ރިޔާސީ ނިޒާމަށް ލިބިފައި އޮތްކަމަށް ވަފުދުގެ ފަރާތުން މަޢުލޫމާތު ދެއްވައެވެ.

ލ. އަތޮޅު
ލ.އަތޮޅުގެ ރަށްތަކަށް މީގެ ދެދުވަސް ކުރިން ޒިޔާރަތް ކުރެއްވި ވަފުދުގެ އިސްބޭފުޅަކަށް ވަޑައިގެންނެވީ ޕާޓީގެ ކައުންސިލް މެންބަރު އަލްފާޟިލާ ޢާއިޝަތު މުޙައްމަދު ދީދީއެވެ. އެކަމަނާގެ އިތުރުން ޕާޓީގެ އިސް އެކްޓިވިސްޓުންގެ ބަޔަކާއި، އަދި ރިޔާސީ ކެންޕޭންޔުނިޓުގެ ކޯޑިނޭޓަރުންގެ ޓީމެއްވެސް ވަނީ ލ.އަތޮޅުގެ ރަށްތަކަށް ޒިޔާރާތް ކުރައްވާފައެވެ. މިޓީމުގެ ބޭފުޅުން ވަނީ ލ.އަތޮޅުގެ ހުރިހާރަށަކަށް ޒިޔާރާތްކޮށް ރިޔާސީ ނިޒާމަށް ވަރަށް އެދެވޭ ކާމިޔާބެއް ހޯއްދެވޭނޭ މަގު ފަހިކުރެއްވުމަށް ފަހު އެބުރި މާލެވަޑައިގަންނަވާފައެވެ. ލ.އަތޮޅުން ރިޔާސީ ނިޒާމަށް 70 ޕަސެންޓް އަށް ވުރެ ބޮޑު ތާއީދެއް ލިބޭނޭ ކަމަށް މެންބަރުން ހާމަކުރައްވައެވެ.

ގއ. އަތޮޅު
ގއ. އަތޮޅުގެ ރަށްތަކަށް ރިޔާސީ ކެންޕޭން ކުރެއްވުމަށް ވަޑައިގެން ހުންނެވީ ޕާޓީގެ މެންބަރު އަދި މިނިސްޓަރ އޮފް ސްޓޭޓް އޯ އެޓޯލްސް ޑިވެލޮޕްމަންޓް އޮނަރަބަލް އަލްފާޟިލާ ފާޠިމަތު ޝީރީން އެވެ. އެކަމަނާގެ ޓީމުގެ ބޭފުޅުން ވަނީ އެއަތޮޅުގައި ދިމާވެފައިވާ އެކި މައްސަލަތަށް ހައްލުކޮށްދެއްވާ އަދި ރިޔާސީ ނިޒާމުގެ ކެންޕޭން ހަރުދަނާ ކުރައްވާފައެވެ. މަޢުލޫމާތު ލިބިފައިވާ ގޮތުގައި ޕާޓީގެ މެންބަރު އަދި ގއ. އަތޮޅުގެ ޢިއްޒަތްތެރި މެންބަރު އަލްފާޟިލް ޢަބްދުއްﷲ ޖާބިރު ވެސް ދަނީ މިއަތޮޅުގައި ރިޔާސީ ނިޒާމަށް ކެންޕޭން ކުރައްވަމުންނެވެ.
ގދ. އަތޮޅު
ގދ. އަތޮޅަށް ރިޔާސީ ކެންޕޭނުގައި ވަޑައިގެންނެވި ވަފުދުގައި ހިމެނިވަޑައިގަންނަވަނީ އެއަތޮޅުގެ ޢިއްޒަތްތެރި މެންބަރު އަލްފާޟިލް ޢައްބާސް އިބްރާހީމްއާއި އަދި އެއަތޮޅުގެ ޚާއްޞަ މަޖިލީހުގެ މެންބަރު އަލްފާޟިލް ޢަބްދުއްﷲ ލަޠީފްއެވެ. މިދެބޭފުޅުންގެ އިތުރުން ޕާޓީގެ އެކްޓިވިސްޓުންގެ ޓީމެއްވެސް ވަނީ މިބޭފުޅުންނާއި އެކު ދަތުރުކުރައްވަމުންނެވެ. ގދ. އަތޮޅުގައި ޤާއިމް ކުރައްވާފައިވާ ސަރަޙައްދީ އޮފީހުގެ ހިންގުންތެރިންނާއި އެކު މިހާތަނަށް ކުރެއްވުނު މަސައްކަތުގެ އަލީގައި ގދ. އަތޮޅުގައި ކާމިޔާބު ހޯދާނީ ރިޔާސީ ނިޒާމް ކަން މިހާރު ވަނީ ކަށަވަރު ވެފައެވެ. އެއީ ތިނަދޫގައި ޚާއްޞަކޮށް ރިޔާސީ ނިޒާމަށް ވަރަށްބޮޑު ތަރްހީބެއް މިހާރު ލިބިފައިވާތީ ކަމަށް ގދ. ސަރަޙައްދީ އޮފީހުންވަނީ މަޢުލޫމާތު ދެއްވާފައެވެ. އެމް.ޑީ.ޕީން ރިޔާސީ ނިޒާމުގެ ކެންޕޭނަރުންނަށް ވަރަށް ބޮޑެތި އުދަގޫތަށް ގދ.އަތޮޅުގައި ކުރަމުންދާކަމުގެ ޝަކުވާވެސް އަޅުގަނޑުމެންނަށް ވަނީ ލިބިފައެވެ.

ޏ. އަތޮޅު
ޏ. ފުވައްމުލަކަށް ރިޔާސީ ނިޒާމް ކެންޕޭނުގެ އިސްބޭފުޅަކަށް ވަޑައިގެން ހުންނެވީ އާބަން ޑިވެލޮޕްމަންޓް މިނިސްޓަރ އޮނަރަބަލް އިބްރާހީމް ރަފީޤްއެވެ. އެމަނިކުފާނުގެ އިތުރުން ޕާޓީގެ ކައުންސިލްގެ ޒުވާނުންގެ ގޮފީގެ ރައީސާ އަލްއުސްތާޛާ ލުބުނާ މުޙައްމަދު ޒާހިރު ޙުސައިން އާއި އަދި ޕާޓީގެ ވަރަށް ސީނިއަރ އެކްޓިވިސްޓުން އެއަތޮޅުގައި ގުރައްންޑްވެގެން ތިއްބަވައިގެން ވަނީ ރިޔާސީ ނިޒާމް ޕްރޮމޯޓް ކުރައްވާފައެވެ. ކުރިއަށް އޮތް ދެދުވަހުގެ ތެރޭގައި އިތުރު ވަފުދެއް ފުވައްމުލަކަށް ޒިޔާރަތް ކުރައްވާނެއެވެ.

އައްޑު އަތޮޅު ސ.
އައްޑު އަތޮޅަކީ ޕާޓީގެ ކެންޕޭން އަށް އެންމެ ބޮޑު ތަރްޙީބު ލިބިފައިވާ އެއް ސަރަޙައްދެވެ. ބަރުލަމާނީ ކެންޕޭނަރުންގެ ބިރުދެއްކުމަށް އެއްވެސް ބެލުމެއް ނެތި ޑީއާރުޕީގެ މެންބަރުން ވަނީ ވަރަށް ބޮޑަށް ރިޔާސީ ކެންޕޭން ފުޅާ ކޮށްފައެވެ. ހިތަދޫގައި ހުސައިން ޞޯލިޙް ހިންގަވާ މަރުކަޒާއި އަދި ފޭދޫގައި ވިމްލާ ރަޝީދު އިސްވެ ހުންނަވައިގެން ކުރިއަށްގެންދަވާ ފޭދޫ ޑީއާރުޕީއޮފީހާއ އަދި މަރަދޫގައި ހުންނަ އޮފީސް މިވަގުތު ބަލަހައްޓަވަމުން ގެންދަވާ ޕާޓީގެ ކައުންސިލްގެ މެންބަރު އަލްފާޟިލާ ފާޠިމަތު ބަދޫރާގެ ބެއްލެވުމުގެ ދަށުން އައްޑުއަތޮޅުގައި ވަނީ ރިޔާސީ ނިޒާމަށް ވަރަށް ބޮޑު ތާއީދެއް ލިބެން ފައްޓާފައެވެ. ގޭބިސީ ތަކަށް ޒިޔާރަތްކުރުމާއި އަދި މަޢުލޫމާތު ދެއްވުމުގެ ބައްދަލުވުންތައްވެސް މިއަތޮޅުގައިވަނީ ބޭއްވެވިފައެވެ. ފޭދޫގައި އާއި ހިތަދޫގައި ރިޔާސީ ހަރަކާތް ވަނީ މެކުހަށް ޖަހާފައެވެ.

މާލެ.
މާލޭގައި ވަރަށް ފޯރި ގަދަކޮށް ރިޔާސީ ނިޒާމުގެ ކެންޕޭން އެބަގެންދެވެއެވެ. މާލޭގެ އެކިސަރަޙައްދުތަކުގައި ދަމާލެވިފައިވާ ބެނާތަކާއި އަދި ޕޯސްޓަރު ތަކުން ވަރަށް ސާފުކޮށް ރިޔާސީ ނިޒާމުގެކެންޕޭން މެކުހަށް ޖަހާފައިވާ ކަން ދޭހަކޮށްދެއެވެ

Report: Soodh
Velidhoo Community